Qańtardyń ortasynda Aqordanyń Esil ózenine qaraǵan kýlýarynda jańadan qurylǵan oblystardyń ekonomikalyq damýyna qatysty jabyq jiyn ótip, Túrkistan, Jetisý, Abai jáne Ulytaý oblystary ákimderiniń jumystary saralandy, – dep habarlaidy DALA INSIDE arnasy óziniń turaqty derekózine júginip.
Balapandy kúzde sanaidy demekshi, jiynda atalǵan oblystarǵa jaýapty inspektorlardyń oi-pikirleri tyńdalǵan.
Arnaǵa jetken aqparat boiynsha, jiynda Túrkistan oblysy ákimi Darhan Satybaldy men Jetisý oblysy ákimi Beibit Isabaevtyń jumysyna joǵary baǵa berildi.
Al ótken jyly jazda Abai oblysynda oryn alǵan orman órtterinen keiin oblys basshysy Nurlan Uranhaevtyń jumysyna qatysty biraz syn aitylǵan bolatyn.
Biraq Uranhaev ózine aitylǵan synnan qysqa ýaqytta nátije shyǵaryp, Aqordanyń senimine taǵy da ie bolǵan. Osylaisha Uranhaev óziniń pozitsiiasyn saqtap qaldy.
Jiynǵa qatysýshylar Ulytaý oblysy ákimi Berik Ábdiǵalidyń jumysyna kóńilderi tolmaityndaryn ashyp aitqan. 2022 jyly maýsym aiynda Ulytaý oblysy ákimi Berik Ábdiǵali myrza Ulttyq quryltaidyń alǵashqy otyrysyn joǵary deńgeide ótkizip, Aqordanyń aldynda senim kreditine ie bolǵan edi. Biraq Berik myrza jiyn-toimen jinaǵan ataq-abyroi ózine jyldar boiy azyq bolmaityny esepke almaǵan syńaily.
Óitkeni jańa oblystyń qurylǵanyna 3 jylǵa taiasa da, ákimdikke baǵynyshty keibir memlekettik mekemeler áli kúnge deiin jekemenshik saýda oryndaryn panalap otyrǵany Aqordaǵa unamaǵan.
Ózge oblystar basqarmalar men mekemelerge arnalyp, ǵimarattar salyp, jumystaryn dóńgeletip ketken. Al Ulytaý oblysynda birqatar memlekettik mekemelerdiń jumysyn uiymdastyrý isi áli kúnge deiin oń sheshimin tappaýda.
Qoǵamdyq ómirde ultjandy azamat retinde tanylǵan Berik Ábdiǵali ákimshilik uiymdastyrý jumystarynyń bulaisha uzaqqa sozyp jibergeni Aqordanyń ashýyn týǵyzyp otyr.
Budan basqa oblys ákiminiń jergilikti jerdegi negizgi jumys berýshi "Qazaqmys" korporatsiiasynyń basshylyǵyna sózin ótkize almaýy da ony tuiyqqa tirei túsken.
DALA INSIDE insaideri, shaǵyn quramda ótken kezdesýde Berik Ábdiǵalidy basqa isker, sharýashylyqqa myǵym ákimmen aýystyrý máselesi bir aýyzdan qoldaý tapqan desedi.
Tarihta Ulytaý oblysynyń alǵashqy ákimi retinde qalatyn Berik Ábdiǵali aldaǵy ýaqytta qos shatyrly Parlamentke qaita oralyp, óziniń súiikti iedologiialyq isimen ainalysýy múmkin.
Aqordanyń kýlýarynda ótken jiynda jaýapty tulǵalar bir aýyzdan "jaqsy depýtattan, sharýaqor ákim shyqpaidy" degen bailamǵa keldi. Aqpan aiynda Ulytaý oblysy ákimin aýystyrý isi boiynsha Prezidentke tiisti usynys daiyndalyp, tapsyrylmaqshy.
Búginde Berik Ábdiǵalidy almastyratyn birneshe kandidattardyń dosesi jan-jaqty elekten ótýde. Senimdi derekkózge súienip, aldaǵy ýaqytta arnamyzǵa úmitkerlerdiń tizimin jariialaýǵa kúsh salatyn bolamyz.
