BAQ-ta Atyraý oblysynyń burynǵy ákimi Bergei Rysqalievtiń uly Aslan Rysqali Londonnan quny 1,3 milliard teńge turatyn páter satyp alǵany týraly aqparat paida boldy, dep habarlaidy Dalanews.kz.
Derekkózder málimetinshe, Aslan Rysqali Londonda ornalasqan, jyljymaityn múlikti basqaratyn Kennington Green Management limited kompaniiasynyń direktory bolyp taǵaiyndalǵan. Kompaniia Kennington Roýd kóshesindegi eki úidiń jalǵa berilýi men kútimine jaýap beredi.
"Vyhod k moriý" Telegram-arnasynyń deregine súiensek, Aslandy bul qyzmeti úshin "úi basqarýshysy" dep ataý durys emes. Sebebi bul kompaniia – páter ieleri kooperativi. Mundai qurylymda ár páter iesi sol úidiń birlesken iesi sanalady jáne jalpy jinalystarda daýys berý quqyǵyna ie bolady.
"Aslan Rysqalidiń Kennington Green Management limited direktory atanýy onyń osy úiden páter satyp alǵanyn bildiredi jáne bul ras", – dep jazylǵan jazbada.
Derekter boiynsha ol 2021 jylǵy sáýirde 346-úidiń tómengi qabatynan 275 sharshy metr aýmaqtaǵy, tórt jatyn bólmesi bar páterdi 1,51 million fýnt sterlingke satyp alǵan. Qazir bul páterdiń quny 1,88 million fýntqa (shamamen 1,3 milliard teńgege) jetken.
Dalanews.kz anyqtamasy
Bergei Rysqaliev 2005 jyldan bastap Atyraý oblysy ákiminiń orynbasary, 2006 jyldan bastap Atyraý qalasynyń ákimi, 2006 jyldan 2012 jylǵa deiin Atyraý oblysynyń ákimi qyzmetin atqardy.
Bergei Rysqaliev 2012 jyly Májilis depýtaty bolǵan aǵasy Amanjan Rysqalimen birge elden qashyp ketken bolatyn. Sol kezde olarǵa halyqaralyq izdeý jariialanǵan edi.
Málimetterge súiensek, Rysqaliev memleketke ondaǵan milliard teńge shyǵyn keltirgen.
