Qazaqstanda benzın men dızel otynynyń qymbattaýy azyq-túlik baǵasynyń ósýine ákelýi múmkin. Bul týraly Saýda jáne ıntegrasıa mınıstri Arman Shaqqalıev málimdedi, dep habarlaıdy Dalanews.kz.

Mınıstrdiń aıtýynsha, kez kelgen ónimniń ózindik qunyna janarmaı men logıstıka shyǵyndary kiredi. Sondyqtan janarmaı baǵasy artsa, ol tikeleı azyq-túlikke áser etedi.

“Baǵa ósedi. Biraq biz jaǵdaıdy baqylap, tıisti sharalardy qolǵa alyp jatyrmyz”, – dedi Shaqqalıev.

Jaz mezgilinde ishki naryqtyń kókónis, jemis-jıdek ónimderimen tolýy baǵa ındeksin ýaqytsha tómendetkenimen, janarmaıdyń ózindik qundaǵy úlesi joǵary bolyp qala beredi.

Mınıstrdiń sózinshe, azyq-túlik óndirýshilerge qoldaý kórsetý úshin jergilikti ákimdikterge jeńildetilgen janarmaı bólý qarastyrylǵan. Sonymen qatar, janarmaı óndirýshiler óz ónimin tómendetilgen baǵamen usynbaq. Bul sharalar ónimniń ózindik qunynyń kúrt ósýine jol bermeıdi.

Saýda mınıstrligi qazirgi tańda óńirlik komısıalar arqyly iri kóterme jáne bólshek saýda jelilerimen tyǵyz jumys júrgizip jatyr. Negizgi maqsat – tasymal shyǵyndaryn azaıtý, taýar tapshylyǵyna jol bermeý jáne baǵa turaqtylyǵyn saqtaý.

Mınıstrliktiń boljamy boıynsha, jyldyq ınflásıa 10,5%-ǵa deıin jetýi múmkin. Alaıda úkimet ony 7,5–8% deńgeıinde ustap turýdy kózdep otyr.

“Bul úshin azyq-túlik baǵasynyń aı saıynǵy ósimi 0,4%-dan aspaýy kerek. Úkimette baǵany turaqtandyrýǵa arnalǵan naqty jospar bar. Biz kúrt qymbattaýǵa jol bermeımiz”, – dep túıindedi Arman Shaqqalıev.