Almatylyq áiel belgili akter Jan Baijanbaev 15 jastaǵy qyzyn filmge túsirý úshin 1,5 million suraǵanyn aityp, daýly jaǵdaidy jariialady, dep habarlaidy Dalanews.kz.
Ulpan Qýanyshbaidyń aitýynsha, 15 jastaǵy qyzy Kórkem áleýmettik jeliden Jan Baijanbaevpen birge filmge túsýge shaqyrǵan kasting týraly habarlandyrýdy kórgen. Uiymdastyrýshylar synaqqa ata-anasymen birge kelýdi suraǵan.
“Kezegimiz kelgende, qyzym kastingke kirdi, al meni bólek bólmege shaqyrdy. Onda menedjer qysqametrajdy film túsiriletinin, basty róldi qyzym oryndaitynyn aitty. Limýzinmen kelip, qyzyl kilemnen ótetinin de ýáde etti. Biraq birden “kishigirim” shartyn qosty – osynyń bári úshin dál qazir, osy jerde 1,5 million teńge tóleýimiz kerek dedi. Tipti, qyzymnyń kózinshe “mamań seni qoldamai otyr” dep qysym kórsetti”, – deidi Ulpan Qýanyshbai.
Bul oqiǵa áleýmettik jelide jariialanǵannan keiin ózge de ata-analar uqsas jaǵdaiǵa tap bolǵandaryn jazdy.
“Ulym basty rólge bekitildi degende qatty qýandyq. Biraq daiyndyq barysyn túsindirgende, oqý aqysymen birge 1,5 million teńge tóleýimiz kerek ekenin aitty, – deidi taǵy bir ata-ana.
Belgili akter Sanjar Mádi mundai usynystardy “alaiaqtyq” dep atady.
“Ókinishke qarai, keibir stýdiialar men prodiýserler balalar men sengish eresekterdiń armanyn paidalanyp, aqsha tabady. Ról úshin nemese agenttik arqyly “juldyz bolý” úshin eshqashan aqsha tólemeńizder”, – dedi ol.
Jýrnalister daý týǵyzǵan kino mektebinen túsinikteme alýǵa tyrysqanymen, uiymdastyrýshylar pikir bildirýden bas tartqan. Al Jan Baijanbaev pen Berik Aitjanovtyń menedjerleri akterlerdiń túsirilimge qatysqanyn rastady.
“Biz tek akter retinde shaqyryldyq. Baǵa men sharttarǵa stýdiia jaýapty. Aqyly oqý ekenin bildik, biraq onyń qunyna qatysymyz joq”, – dedi menedjer.
Rejisser Erlan Nurmuhambetov ata-analar da jaýapkershilik arqalaitynyn aitady.
“Belgili akterler de belgili bir deńgeide moraldyq jaýapkershilikke ie. Óitkeni halyq aldymen solarǵa senedi. Al ata-analar mundai usynystardy qabyldar aldynda ony kim usynyp otyrǵanyn, qandai bedeli baryn anyqtaýy kerek”, – dedi ol.
Zańgerlerdiń aitýynsha, mundai áreketti alaiaqtyq dep dáleldeý qiyn. Degenmen kino salasynda kastingten ótken akterge, kerisinshe, eńbekaqy tólenetini belgili.
