Belarýs. Oppozitsiialyq telegramm-kanaldarǵa jazylǵandar 7 jylǵa deiin sottalady
Málimetke qaraǵanda, mundai kanaldardyń tirkelýshilerin jeti jylǵa deiin bas bostandyǵynan aiyrý jazasy qarastyrylyp jatyr.
IIM Qylmystyq toptarǵa jáne korrýptsiiaǵa qarsy kúres basqarmasynyń telegram-kanalyndaǵy málimdege sáikes, bul shara belarýs úkimetiniń «Ekstremizmge qarsy sharalar týraly» 12 qazanda qabyldanǵan buiryqqa bailanysty bolmaq.
Biyl aqpan aiynda ekstremistik dep tanylǵan chattar men kanaldarǵa tirkelý ákimshilik quqyq buzýshylyq bolyp esepteletinin eskertip, jazylýshylarǵa aiyppul sala bastaǵan.
Belarýsta ekstremistik dep tanylǵan telegram-kanaldardyń tiziminde oppozitsiialyq aqparat quraldary da bar.
2020 jyly qazanda Minsk qalalyq soty 990 myń tirkelýshisi bar NEXTA telegram-kanalyn ekstremistik dep tapqan. Biyl tamyz aiynda osyndai sheshim Tut.by jańalyqtar portaly men Zerkalo.io basylymyna qarata qabyldanǵan.
Belarýs biligi 2020 jyly tamyzda ótken prezident sailaýynan keiin narazylyq aktsiialardan soń oppozitsiia ókilderin jáne olardyń jaqtastaryn qýǵyndap keledi. Onda sailaý nátijesi boiynsha ólke prezidenti Aleksandr Lýkashenko jeńiske jetti dep jariialanǵan. Mitingke shyqqan myńdaǵan adamǵa qylmystyq is qozǵaldy. On myńdaǵan adam ólkeden qashyp ketýge májbúr bolǵan. Quqyq qorǵaýshylar sottalǵan 805 adamdy saiasi tutqyn dep tapqan.
