Qazaqstan Premer-Mınıstri Oljas Bektenov Premer-Mınıstrdiń birinshi orynbasary Roman Sklár men tótenshe jaǵdaılar mınıstri Shyńǵys Árinovtiń, jekelegen óńirler ákimderiniń baıandamalaryn tyńdady, dep habarlaıdy Dalanews.kz.
Úkimet basshysyna qar men muzdyń kúrt erýine baılanysty jáne sý tasqynyna qarsy júrgizilip jatqan jumystar aıasynda óńirlerde qalyptasyp otyrǵan ahýal týraly baıandaldy.
Tótenshe jaǵdaılar mınıstrliginiń málimetinshe, jumystarǵa jeke quramnan 2500 adam, 700-ge jýyq tehnıka, 290-nan astam sý aıdaý jáne júzý quraldary jumyldyrylǵan. Jumystar is-qımyl algorıtmine sáıkes júrgizilýde. "Jedel jeli" telefondary: TJM 8 717 2 70 41 14, sonymen qatar óńirlik baılanys ortalyqtary jumysyn jalǵastyrýda.
Almaty, Aqmola, Aqtóbe, Batys Qazaqstan, Shyǵys Qazaqstan, Soltústik Qazaqstan, Qostanaı, Qaraǵandy, Pavlodar, Abaı, Ulytaý oblystarynda jáne Astana qalasynda respýblıkalyq jáne oblystyq jedel shtabtar jumys isteıdi.
Tótenshe jaǵdaılar mınıstrligine óńirlerdiń ákimdikterimen birlesip, sý tasqynyna qarsy jumystardy jalǵastyrý jáne eldegi ahýal týraly táýlik saıyn esep berý tapsyryldy.
