"Bizdiń boljamymyz boıynsha shamamen 11-16 naýryz aralyǵynda Qazaqstanda koronavırýs taralady. Alaıda bul tek boljam, ol rastalmaýy da múmkin", - dedi Bas sanıtar.
Bekshın Qazaqstanda koronavırýs tirkelgen jaǵdaıda birden arnaıy is-sharalar júrgiziletinin aıtty.
Densaýlyq saqtaý mınıstrliginiń mundaı jaǵdaıǵa arnalǵan B jospary bar. Oqý oryndary jabylyp, barlyq buqaralyq sharalar toqtatylady, naýqastar men baılanysta bolǵandardy májbúrli oqshaýlaý talaptary júzege asyrylady.
Aǵymdaǵy jyldyń 6 qańtarynan bastap koronavırýstyq ınfeksıanyń ákelinýi men taralýyn boldyrmaý úshin kúsheıtýdiń tórt kezeńi júzege asyryldy, shekaralarda sanıtarlyq-epıdemıologıalyq baqylaý kúsheıtildi, koronavırýs taralǵan eldermen áýe qatynasy shektelip, toqtatyldy.
QR UQK Shekara qyzmetiniń málimetinshe, 2020 jyldyń 1 aqpanynan 4 naýryzyna deıin Qazaqstanǵa memlekettik shekara ótkizý pýnktteri arqyly barlyq elderden 1 736 462 adam keldi, onyń ishinde EAEO elderinen 992,623 adam. 6 qańtardan 5 naýryzǵa deıin Qazaqstanǵa Qytaıdan memlekettik shekara arqyly 33124 adam keldi.
7 naýryzda Qazaqstan koronavırýs taralýy qaýipi joǵary elderdiń tizimin jańartty.
