Almaty oblysy Talǵar aýdanynyń soty Almaty qalasyndaǵy halyqaralyq áýejai mańyndaǵy "jerge bailanysty aila-sharǵy" týraly is boiynsha aiyp taǵylǵan burynǵy sheneýnikterge úkim shyǵardy.
Talǵar aýdanynyń eks-sheneýnikteri 2017 jyldan 2019 jyldyń aralyǵynda áýejai mańyndaǵy Qyzyltý aýylynyń syrtyndaǵy jerdi memleket ieliginen zańsyz alyp, keiin paida tabý maqsatymen satqany úshin aiypty dep tanylyp, túrli merzimge bostandyǵynan aiyryldy. Olarǵa qyzmet ókiletin teris paidalaný, laýazym ókiletin nemese bilikti asyra paidalaný, alaiaqtyq baptary boiynsha aiyptar taǵyldy.
Informburo basylymynyń habarlaýynsha, Talǵar aýdany sotynyń 2022 jylǵy 10 maýsymdaǵy úkimimen Talǵar aýdany ákimdigi sáýlet jáne qala qurylysy bóliminiń burynǵy bastyǵy Marat Ryspekov 6 jylǵa; aýdan ákimdigi jer qatynastary bóliminiń burynǵy bastyǵy Maqsat Tynybai 6 jyl 3 aiǵa; Panfilov aýyldyq okrýginiń burynǵy ákimi Nurǵali Appazov 8 jylǵa; Panfilov aýyldyq okrýgi ákiminiń burynǵy orynbasary Qurmanhan Ǵalieva 5 jylǵa bostandyǵynan aiyryldy.
Talǵar aýdany ákimdigi jer qatynastary bólimi bastyǵynyń mindetin atqarǵan Madiiar Qadyrjan Qazaqstan táýelsizdiginiń 30 jyldyǵyna orai jariialanǵan raqymshylyq aiasynda jazadan bosatyldy.
Sot osy adamdardyń barlyǵyn memlekettik qyzmet atqarý quqyǵynan ómir boiyna aiyrdy. Sot úkimi áli kúshine engen joq.
2019 jylǵy 27 jeltoqsanda Bek Air áýe kompaniiasynyń Almatydan Nur-Sultan qalasyna ushyp shyqqan Fokker 100 jolaýshy ushaǵy apatqa ushyraǵan.
Ushaqta 98 adam (beseýi – ekipaj múshesi) bolǵan. Apat saldarynan 12 adam qaitys boldy, 69 adam jaraqat aldy.
Qazaqstan biligi 2020 jylǵy qańtarda Bek Air áýe kompaniiasynyń eksplýatant sertifikaty men ushýǵa jaramdylyǵy týraly sertifikattarynyń kúshin toqtatty. Áýe kompaniiasy ókilderi áýejai mańyna salynǵan qurylys bolmaǵanda adam shyǵyny bolmas edi dep málimdedi.
2020 jyly Almaty oblysynyń jemqorlyqqa qarsy qyzmeti ushaq apatyna bailanysty qylmystyq ispen qosa Talǵar aýdany ákimdigi sheneýnikteriniń ústinen jer telimderin zańsyz berý jáne olardyń paidalaný maqsatyn zańsyz ózgertý faktileri boiynsha ekinshi qylmystyq is qozǵady.
Byltyr sot Bek Air jolaýshy ushaǵy apatqa ushyraǵan Almaty qalasy áýejaiy mańyndaǵy jerdi paidalanýǵa zańsyz bergen degen aiyp taǵylǵan burynǵy bes sheneýnik pen rieltordy aiypty dep tanyp, úkim shyǵarǵan. Úsh adamnyń bostandyǵy úsh jylǵa shektelip, qalǵandary 2,5 jyldan 4 jylǵa deiingi merzimge bostandyǵynan aiyrylǵan.
Qazaqstanda keiingi 10 jylda adamdardyń ómirin áketken birneshe ushaq apaty boldy:
- 2021 jylǵy 13 naýryzda Almaty áýejaiy mańyndaǵy Qyzyltý aýylynda Qazaqstan Ulttyq qaýipsizdik komiteti áýe qyzmetiniń AN-26 áskeri ushaǵy apatqa ushyrady. Ushaqta bolǵan alty kisiniń tórteýi qaza taýyp, ekeýi aýrýhanaǵa jetkizildi;
- 2019 jylǵy 27 naýryzda Aqtaýdan Shymkentke ushyp bara jatqan Qazaqstan qarýly kúshteriniń Mi-8 tikushaǵy Qyzylorda oblysynda apatqa ushyrady. Qazaqstan qorǵanys ministrligi tikushaqta bolǵan 13 adamnyń báriniń qaza tapqanyn habarlady;
- 2016 jyly 27 qańtarda Almaty oblysynda Alakól aýdanynan Taldyqorǵan qalasyndaǵy aýrýhanaǵa naýqas balany apara jatqan UP-MD 600-N tikushaǵy qulap, bes adam mert bolǵan;
- 2015 jyly 20 qańtarda Jambyl oblysynda bortynda ekipaj múshelerimen qosqanda jeti adam bolǵan "An-2" ushaǵy qulaǵan. Apattan bir adam – jolaýshy áiel ǵana tiri qaldy;
- 2013 jyly 29 qańtarda Almaty áýejaiyna jaqyn Qyzyltý aýylynyń tusyna Kókshetaýdan Almatyǵa jolaýshy ákele jatqan Scat kompaniiasynyń CRJ-200 ushaǵy qulap, 21 adam (16 jolaýshy men 5 ekipaj múshesi) qaza tapqan edi;
- 2012 jylǵy jeltoqsanda Shymkent túbinde Qazaqstan ulttyq qaýipsizdik komiteti Shekara qyzmetiniń An-72 ushaǵy apatqa ushyrap, 27 adam qaza bolǵan.
