Tyshqandar men shybyndar 19 qyrkúiekte ǵaryshtan Jerge oralady, dep habarlaidy Dalanews.kz.
«Roskosmos» habarlaýynsha, 19 qyrkúiekte «Bion-M» №2 ǵarysh apparaty tiri organizmdermen birge Jerge qonady.
Bul apparat 20 tamyz kúni Baiqońyr ǵarysh ailaǵynan «Soiýz-2.1b» zymyran-tasyǵyshymen ushyrylǵan bolatyn. Bir ailyq orbitalyq saparǵa 75 tyshqan, drozofila shybyndary, jasýsha mádenietteri, ósimdikter, dándi jáne burshaqty daqyldardyń úlgileri, sondai-aq buǵan deiin ǵaryshta bolǵan tuqymdardan ósirilgen ósimdik tuqymdary jiberildi. Buǵan qosa, ǵaryshqa sańyraýqulaqtar, qynalar, mikroaǵzalar, bakteriialar jáne basqa da materialdar attanǵan.
Ǵalymdardyń aitýynsha, tyshqandardyń bir bóligi quramynda suiyqtyǵy bar pasta tárizdi jemmen qorektenedi, al ekinshi top kádimgi qurǵaq brikettelgen jem men bólek gel túrindegi sýdy tutynady. Bul tehnologiia álemde alǵash ret qoldanylyp otyr, dep málimdedi Resei ǵylym akademiiasynyń Mediko-biologiialyq máseleler institýty.
