Baiannyń qyzy jýrnalisterden telefon nómirin umytýdy ótindi
Atalǵan baǵdarlamanyń jýrnalisteri Aisáýle Baqytbekti qaiyrymdylyq týraly suhbatqa shaqyrǵan. Boijetken kelisip, týǵandaryna baǵdarlamany teledidardan qaraýdy ótinedi. Alaida siýjette qaiyrymdylyq emes, onyń otbasyna qatysty sózder aitylǵan eken. Ol jýrnalisten aldyn ala siýjetke otbasyn qospaýdy suraǵandyqtan, qazir qatty ashýlanyp otyrǵan-dy.
– Kásibilikti saqtamaǵan NTK arnasy REVIý baǵdarlamasynyń jýrnalisterine narazylyǵymdy bildirgim keledi. Atalǵan baǵdarlamanyń ótirikshi korrespondenti qońyraýyma jaýap bermegendikten, osy jerde jazýǵa májbúrmin. Qymbatty @ntk_channel, sizdiń túsirilim tobynyńyz 23 qańtar dúisenbi kúni qaiyrymdylyq týraly menen suhbat alýǵa keldi. Suhbat bastalmas buryn men qandai suraqtar qoiylatynyn surap aldym. “Teplo” qoryna qatysty 5-7 suraqtan keiin jýrnalist otbasyma qatysty suraqtar qoia bastady. Biz mundaiǵa kelispegen edik. Sol sebepti otbasyma qatysty eshnárse aitpaitynymdy jetkizdim. Suhbattan keiin osy bólikti esh jerge kiristirmeýdi suradym.
Jýrnalist “Iá, árine, tek qaiyrymdylyq týraly jariialaimyz” dedi. Men mundai jaman jolmen ózine material izdeýiniń sebebin jaqsy túsinemin. Biraq dál bulai ashyq ótirik aitýdyń ne qajeti bar? Birinshiden, dybystaý kezinde meniń otbasyma qatysty esh suraq qoiylmaǵan-dy. Artynsha olardyń bul reportajdy aldyn ala daiyndap qoiǵanyn bildim. Ekinshiden, men “Teplo” qorynyń uiymdastyrýshylaryna osy suhbat týraly aittym, Babasiadan da teledidardy qaraýdy suradym. Iaǵni olardy bosqa úmittendirdim. Esesine ne bolǵanyn bilesizder me?
Úshinshiden, meniń ótinishime qaramastan, reportajǵa otbasym týraly suraqty kiristirdi. “Ne úshin?” degen bir ǵana suraǵym bar. Eger jýrnalisterińizdiń dál osyndai adamgershiligi joq, ádepsiz, betke qarap turyp ótirik aitatynyn bilgenimde, sizdermen birge jumys isteýge eshýaqytta kelispeitin edim. Osy jaǵdaidy túsindirip, keshirim suramaityn bolsa, adamgershilik pen adamnyń jeke ómirge degen quqyǵyn qalai umytsańyzdar, dál solai meniń telefon nómirimdi de umytyńyzdar. Kóp rahmet. Qyzmetkerińizge menen jalyndy sálem jáne kelesi keńesti joldańyz: “Men otbasyma qatysty pikirimdi bólispeimin”. Esesine siz bildei bir arnanyń bedeline nuqsan keltirdińiz. Sizderdi aiaǵandyqtan, sotqa shaǵym túsirmeimin. Fý” – deidi Aisáýle Baqytbek.
