Bai balasy kóligimen qurylysshylardy qaǵyp óltirip, qashyp ketti
BMV-nyń astynda qalǵan jumysshylardyń biri oqiǵa ornynda til tartpai ketse, taǵy úsh jumysshy túrli jaraqatpen aýrýhanaǵa jetkizilgen, dep habarlaidy KTK. Qazir olardyń bireýi hál ústinde. Al jóndeý jumystary júrgizilip jatqanyn kórsetetin belgilerge qaramai, qazylǵan orǵa túsip ketken júrgizýshi qymbat kóligin tastai qashqan. Politseiler 20 jastaǵy jigitti 3 kúnnen beri izdestirip jatyr.
– Jantúrshigerlik jol apaty senbi kúni qalanyń qaq ortasynda bolǵan. Tańǵy saǵat 5 jarymda jumysshylar qubyrlardy aýystyrý úshin jolǵa shyǵypty. Osy kezde joǵary jyldamdyqpen júitkip kelgen BMV eshqandai jóndeý jumystary júrgizilip jatqany jónindegi belgiler men qorshaýǵa qaramastan bir top jumysshyǵa bettepti. Qymbat kólik zýlap kelgen boiy 4 adamdy qaǵyp ótip, myna aryqqa túsip ketken. Al apat ornynda qan izderin áli de baiqaýǵa bolady.
Basqa jumysshylar qansyrap jatqandarǵa kómekke júgirgen sátte BMV ishinde bolǵan eki azamat apat ornynan taiyp turǵan. Aýyr jaraqat alǵan jumysshylardyń bireýi 21 jastaǵy Álibek esimdi azamat sol jerde kóz jumǵan. Taǵy úsheýi túrli dene jaraqatymen aýrýhanaǵa jetkizildi. 18 jasar eki jumysshy sol kúni-aq úiine jiberilse, dárigerler 38 jastaǵy Erkinbek Asylbaevtyń jaǵdaiy aýyr dep otyr. Birneshe márte ota jasalǵan ol qazir jansaqtaý bóliminde jatyr.
– Bastyń jabyq mi jaraqaty, midyń shaiqalý diagnozy. Kókirek qýysynyń jabyq jaraqaty, buǵananyń synýy, ishtiń jabyq jaraqaty. Baýyrdyń jyrtylýy, jedel ota jasaldy. Baýyrdyń laportomiiasy, jyrtylǵany tigildi, deidi Shymkent qalalyq jedel-járdem aýrýhanasynyń bólim meńgerýshisi.
Al jol apatyn jasap, oqiǵa ornynan qashyp ketken júrgizýshiniń ózi áli izdestirilýde. 20 jasar kúdiktiniń sýretteri áleýmettik jelilerge de kóptep shyǵaryldy. Ǵalamtordaǵy derekterge súiensek, Ismaiyl Súleiman esimdi jigit AQSh-tyń bedeldi kolledjderiniń birinde oqýyn aiaqtap, Dýbaida joǵarǵy oqýyn jalǵastyryp júr eken. Qazir kúdiktini izdestirip jatqan ishki ister departamentindegiler onyń atyn atamasa da, ustalǵan jaǵdaida jazasy aýyr bolatynyn aitady.
– Onyń avtokóliginen gazdy tapansha alynǵan. Jáne de osy jol-kólik oqiǵasyna bailanysty QR Qylmystyq kodeksiniń 3 baby boiynsha qylmystyq is qozǵaldy. Ol 345 bap boiynsha «jol erejesmin buzý» jáne 347 bap boiynsha «bolǵan oqiǵa jerinen boi tasalaý ketý». Jáne 283 baby boiynsha «zańsyz qarý saqtaý, tasymaldaý», – dedi OQO IID Anyqtaý basqarmasynyń asa mańyzdy tapsyrmalar boiynsha aǵa anyqtaýshysy Saltanat Qarakózova.
Apat oryn alǵan kezde kúdiktiniń janynda bolǵan dosynan politseiler jaýap alýda. Tergeýshiler qymbat kóliktiń tizgininde bolǵan júrgizýshiniń spirttik ishimdik ishken bolýy múmkin degen nusqanyda qarastyryp jatyr.
Derekkóz: "Karavan" gazeti
