2014 jyldan beri ishki jáne syrtqy investitsiialardy tartý jóninen Almaty oblysy alda keledi. 2014-2016 jyldardyń aralyǵynda oblystaǵy ishki investitsiia 27 paiyzǵa ósken (2016 jyly 477 mlrd teńge).
Byltyrǵy jyldyń qorytyndysy boiynsha Almaty oblysy shikizattyq emes sheteldik investitsiialar tartý jaǵynan kósh bastaǵan. Ótken jyly óńirge shamamen 77 mlrd teńge investitsiia tartylǵan. Shikizattyq emes investitsiia kólemi oblysta osymen úshinshi jyl qatarynan 20 paiyzǵa ósip otyr.
Sharanyń shymyldyǵyn túrgen Almaty oblysynyń ákimi Amandyq Batalov óńirge investor tartýdyń tabysty joldaryn aityp berdi.
“Investordyń tilin tabý úshin iskerlik formatty ustaný qajet” dedi óńir basshysy.
Forýmda eshkim kútpegen tosyn jaǵdai boldy. Sahnadaǵy sarapshynyń sózin bólip, ortaǵa shyqqan taldyqorǵandyq Talǵat esimdi kásipker á degende jiyndaǵy jurtty abdyratyp tastady.
Kásipkerdiń aitýynsha óńirde iri investorǵa kóp kóńil bólinip, shaǵyn biznes shettep qalýda.
"Bul sharada kóbinese iri investorlarǵa sóz berilýde. Iriniń aty iri ǵoi. Mundai biznestiń aýqymy keń, múmkindigi mol, tiisinshe tabysy da tolaiym. Al shaǵyn kásipkerlerge nendei jaǵdai jasaýdasyzdar? Dál qazir meniń qolymda 100 myń dollar bar. Iri investorge bul qarjy mardymsyz kórinýi múmkin, biz úshin (shaǵyn kásipkerler úshin) qomaqty aqsha. Osy qarajatty qaida baǵyttap, qaida investitsiialai alamyn?" – degen kásipker saýalyn oblys ákimine tikelei qoidy.
Alaida Amandyq Batalov sasqan joq. Forýmǵa delegat retinde qatysqan kásipkerge egjei-tegjeili jaýap berdi.
"Ainalaiyn atyń kim? Talǵat? Túsinikti. Bizde iri investordan bólek, shaǵyn jáne orta kásippen ainalysatyn 123 myń kásipker bar. Óńirdegi shaǵyn-orta kásiptiń úlesi sońǵy jyldary 11 paiyzdan 34 paiyzǵa deiin ósti. Shaǵyn kásipkerler qoldaýǵa kende emes.
Shaǵyn kásipkerlerdi qoldaýǵa 6 paiyzben 6 mlrd teńgeden asa qarjy bóldik. Alyńyz, paidalanyńyz! Jer alyp, qurylys salǵyńyz kelse, konkýrsqa qatysyńyz. Esigimiz ashyq.
Byltyrǵy jyly shaǵyn jáne orta biznestiń esebinen oblysta 35 myń jumys orny quryldy. Ótken jyldy "100 shaǵyn jáne orta biznes nysandary ashylatyn" jyl dep atadyq. Shaǵyn - orta biznestiń arqasynda oblystyń jeke tabysy 220 mlrd teńgege deiin ósti.
Sizdiń kez-kelgen saýalyńyzǵa jaýap bere alamyn. Shaǵyn biznesti qoldaýǵa eki bilegimdi túrip myna meniń ózim aralastym. Kásipkerlerge qoldaý joq degenińiz, negizsiz. Odan da baryp ornyńyzǵa otyryńyz. Bul sharada sizderge qajetti áli talai málimet beriledi", – dedi oblys ákimi.
Jiyn sońynda Batalov aryz aityp kelgen kásipkerdiń máselesin sheshýdi tiisti basqarma basshylaryna tapsyrdy.
