– Maǵan qalamyzda jaqynda ǵana qyzmetin bastaǵan «Qolǵabys» qorynyń ókilderi jer bolsa, úi salyp berýge ázirmiz dep habarlasty. Qurylys materialdaryn qamtamasyz etýge nietti kásipkerler de joq emes eken. Endeshe, osyndai igi isti ákimdik tarapynan zań talaptary sheńberinde sheship berýimiz kerek, – dedi Gúljan Mamytqyzy.
Qala ákimi bul máselege qatysty jer qatynastary bóliminiń basshysy Erǵali Qýandyq pen qurylys bóliminiń basshysy Temirhan Satybaldyǵa jedel túrde úi salýǵa laiyqty 2-3 jer ýchaskesiniń máselesin sheshýdi tapsyrdy. Óz kezeginde jaýapty mamandar tez arada qujattamalyq tártipke sai zańdy jer bólýdi bastap ketti.
Qordyń qoldaýymen qalada áleýmettik dúken de iske qosyldy. Ol jerde muqtaj jandarǵa kiim-keshek pen turmystyq zattar jáne azyq-túlik sebetteri tizim boiynsha tegin úlestiriledi.
«Qolǵabys» qorynyń tóraǵasy Syrlybek Musabekovtiń aitýynsha, qor ókilderi áleýmettik qiyn jaǵdaidaǵy jandarǵa kómektesýmen ǵana shektelmei, otbasylyq qundylyqtardy dáriptei otyryp, qaladaǵy ardagerler keńesimen de etene jumys júrgizýde. Iaǵni, qoǵamdyq máseleler men daý-janjaldardyń oń sheshilýine de atsalysýda.
Sonymen qatar, belsendi jastardy bir maqsatqa jumyldyrý arqyly «Eko-Arys» jobasyn qolǵa alýda. Ol jerde jastar bosaǵan plastikalyq qutylardy ótkizýden túsken qarjyny qajetke jaratyp, turmysy tómen otbasylarǵa kómektesedi.
