«Baspana Hıt» ıpotekalyq baǵdarlamasy boıynsha paıyzdyq mólsherlemeler 11,25%-dan 10,75%-ǵa deıin tómendetildi dep habarlaıdy Qazaqstannyń ornyqtylyq qory.

Paıyzdyq mólsherlemedegi ózgerister QR Ulttyq bazalyq mólsherlemeni 9,5%-dan 9%-ǵa deıin tómendetý boıynsha sheshimin jarıalaýy nátıjesinde boldy.

«Baspana Hıt» baǵdarlamasy boıynsha jyldyq syıaqy mólsherlemesiniń mólsheri QRUB bazalyq mólsherlemesine baılanysty bolatynyn (QRUB bazalyq mólsherlemesi +1,75%) eske salamyz.

Bul baǵdarlama boıynsha mólsherleme ıpotekalyq qaryz shartyn jasaý sátinde tirkeledi jáne klıent úshin ózgerissiz qalady. Osyǵan baılanysty paıyzdyq mólsherlemedegi ózgerister jańa qaryz alýshylarǵa ǵana qatysty bolady.

«Baspana Hıt» baǵdarlamasynyń talaptaryna sáıkes 300 mlrd teńgege qaryz berý josparlanyp otyr, búgingi tańda onyń 224 mlrd teńgesi ıgerildi.