Ortalyq kommýnikatsiialar qyzmetinde ótken brifingte Bas prokýratýra men Ishki ister ministrliginiń ókilderi eldegi quqyqtyq tártiptiń jai-kúii týraly aityp berdi, dep habarlaidy Dalanews.kz QR Bas prokýratýrasynyń baspasóz qyzmetine silteme jasap.
Óz sózinde Bas prokýratýranyń Qyzmet bastyǵy Saparbek Nurpeiisov prokýratýranyń birneshe ret jasaǵan eskertýine qaramastan, jekelegen adamdar arandatýshylarǵa erip, mitingilerge shyǵyp, tártip saqshylaryna shabýyl jasaǵan. Nátijesinde, úsh politsiia qyzmetkeri zaqymdandy. Bul rette osy áreketterge jaýap retinde politsiia qyzmetkerleri azamattarǵa arnaiy quraldar qoldanbaǵan.
Spiker azamattardyń tynyshtyǵyn qorǵaý úshin óreskel zań buzǵandardy politsiia bólimderine jetkizgendigin atap ótti.
- Zańsyz aktsiiaǵa qatysqany, politsiia qyzmetkerleriniń zańdy talaptaryna baǵynbaǵany úshin 957 adamdy sot ákimshilik jaýapkershilikke tartty, onyń ishinde qamaýǵa alynǵany - 670, aiyppulǵa – 115 jáne 172 adamǵa eskertý jasaldy. 12 maýsym kúni Memleket basshysy Bas Prokýrorǵa azamattardyń zańdy quqyqtaryn qamtamasyz etý boiynsha dereý sharalar qabyldaýdy tapsyrǵanyn eske salamyz, - delingen vedomstvo taratqan aqparatta.
"Ustalǵan tulǵalardyń naqty sany men olardyń kinálarynyń deńgeiin anyqtaý qajet. Narazylyq ornynda kezdeisoq bolǵan kinásiz azamattar men tulǵalardy bosatý kerek",- dedi Qasym-Jomart Toqaev.
Osyǵan bailanysty qadaǵalaý ókilettigi aiasynda prokýrorlar 311 adamǵa qatysty sotqa qamaý merzimin tómendetý týraly apelliatsiialyq ótinishhat jiberdi jáne ol qanaǵattandyryldy.
Búginde arnaiy qabyldaý mekemelerinde 180 adam qamaýda jazasyn óteýde.
