Qazaqstan bas prokýrorynyń orynbasary Áset Shyndaliev jelini shýlatqan Bergei Rysqalievke bailanysty pikir bildirdi, dep habarlaidy Dalanews.kz.
“Qazaqstanda sottalǵan Bergei Rysqaliev qalaisha Londonda emin-erkin júr?” dep suraǵan BAQ ókilderine Shyndaliev máseleniń bulyńǵyr ekenin aityp, eks-sheneýnikti elge jetkizý ázirge múmkin emes ekenin atap ótti.
"Atyraý oblysynyń eks-ákimine syrttai úkim shyqqan. Ókinishke qarai Ulybritaniia men Qazaqstan arasynda ony ekstradatsiialaý boiynsha eshqandai kelisim joq. Al tiisti kelisim bolmasa, bizdiń quqyq qorǵaý organdary eshteńe istei almaidy. Resmi saýal joldańyzdar. Bálkim, mundai ótinimder jiberilgen de shyǵar. Biraq onyń qalai oryndalǵanyn bilmeimin", – dedi Qazaqstan bas prokýrorynyń orynbasary.
Eske sala keteiik, buǵan deiin áleýmettik jelide Bergei Rysqaliev pen Aslan Mýsinniń Londonda birge túsken fotosy jariialanǵan edi. Muny qoǵam belsendisi Turarbek Qusaiynov taratqan bolatyn.
"Shyndyǵynda Atyraý jurtyna keń tanymal Bergei aǵamyzdyń ainalasyndaǵy jigitter Evropadaǵy qazaq diasporasynyń ishindegi eń myqty top desek bolady. Bul aǵalarymyzdy sýdan taza, sútten aq demeimin,sebebi Qazaqstan sekildi sýper prezidenttik júiede jemqorlyqtan eshkim ada bola almaidy.Biraq qalai aitsaq ta, ár qazaq- meniń jalǵyzym demekshi, elden jyraq júrgen kez kelgen evropashyl qazaq biz úshin qymbat bolýy tiis...", - dep jazdy qoǵam belsendisi.
2013 jyldyń 5 aqpanynda Bergei Rysqalievke izdeý jariialanǵan. Oǵan Qylmystyq kodekstiń 176-baby boiynsha kózdelgen qylmysty jasady jáne uiymdasqan qylmystyq qoǵamdastyq qurdy degen aiyp taǵyldy. 2019 jyldyń 25 qańtarynda syrttai sot otyrysy ótip, Atyraý oblysy jáne Atyraý qalasynyń eks-ákimi 17 jylǵa bas bostandyǵynan aiyryldy.
Ol saiasi sebeptermen Ulybritaniiada bosqyn mártebesin alǵan. Sebebi eldiń Joǵarǵy soty qylmystyq qýdalaýdyń saiasi astary bar dep sheshken.
