Mańǵystaý oblysynyń ákimi Nurdáýlet Qilybai óńirge jumys saparymen kelgen Halyq ártisi Dimash Qudaibergenmen kezdesip, oblystyń týrizm áleýeti jaiynda áńgimelesti, dep habarlaidy Dalanews.kz.
Mańǵystaý oblysy ákiminiń baspasóz qyzmetiniń málimetinshe, kezdesý barysynda oblys ákimi memleket basshysynyń tapsyrmasymen týrizm salasynda qolǵa alynyp jatqan jobalar týraly aityp, ánshini 2025 jyly Aqtaý qalasynda ótetin Túrki álemine ortaq mereili sharaǵa qatysýǵa shaqyrdy.
"Dimash qasietti Mańǵystaý jerinde seni kórgenimizge óte qýanyshtymyz. Seniń bul saparyń – oblysymyzdaǵy týrizmdi damytýǵa zor serpin beredi dep oilaimyn. Memleket basshysy Qasym-Jomart Kemeluly Toqaev Mańǵystaýdyń týrizm salasyndaǵy áleýetiniń joǵary ekenin aityp, damytýdy tapsyrǵan bolatyn. Búginde biz bul salaǵa tyń serpin berý úshin infraqurylym máselesin keshendi túrde sheship, týrister úshin qyzmet sapasyn jaqsartý baǵytynda jumystanyp jatyrmyz. Baký jáne Dýbai qalalarynyń úlgisimen Aqtaý qalasynyń bas josparyn qaita qaraý máselesin qolǵa aldyq. Týristerdi tartý maqsatynda "Jyly jaǵajai" aýmaǵynda birqatar iri jobalar jasalyp jatyr. Buiyrsa Aqtaýdy iri kýrorttyq ortalyqqa ainaldyrý josparymyz bar", - dedi Nurdaýlet Qilybai.
Elimizdiń ónerin álemge tanytqan ult maqtanyshy, talantty ánshi Dimash Qudaibergen Qazaq týrizminiń ambassadory retinde Mańǵystaýdyń tarihi-mádeni jerlerin aralap shyqty. Kieli óńirdiń rýhaniiaty, mádenieti men týrizmin kórsetetin deńgeii bólek týyndy ázirleýdi josparlaýda. Mańǵystaý oblysyna alǵash ret kelgen ánshi óńirdiń tumsa tabiǵatynan erekshe áser alǵanyn jáne mundaǵy týristik nysandardy nasihattaýǵa úles qosýǵa daiyn ekenin jetkizdi.
"Bozjyraǵa jaqyndai bergennen bastap, keremet áserge bólendik. Ertegi álemine tap bolǵandai kúi keshtik. Sózben aityp jetkizý múmkin emes. Týrizm salasyn damytý baǵytynda alǵan isterińizge sáttilik tileimin. Demalys oryndaryn daiyndaý, ishki, syrtqy týristerdi tartý ońai jumys emes. Bizde el múddesi úshin, mádenietimizdi damytý baǵytynda jumys istesek odan basqa arman joq. Osy eldiń balasy bolǵandyqtan barynsha qoldaýǵa daiynbyz",- dedi Dimash Qudaibergen.
