Keıin bul jigit óziniń dostarymen tanystyrǵanda, "bankomatta qazaq tilin tandaıtyn jigit" dep qaljyndap tanystyratyn boldy.
Sol kezde bul jaıǵa asa mán aýdarmappyn. Biraq ýaqyt óte kele, dostarym, týysqandarym, jalpy búkil aınalamdaǵy QAZAQSHA SÓILEITİN adamdardyń 99%-y bankomatta oryssha tandaıtynyna kózim jetti. Sol adamdardyń arasynda qazaq tili úshin jany ashıtyndar az emes.
Biraq, nelikten qazaq tilin tandaý mańyzdy? Al, sebebi mynaý. Bank júıelerin jaqsy túsinetin adam retinde aıta keteıin. Ár bank, jalpy deni saý ár bıznes ózine 'Tutynýshy portretin' qurady. Ol ne? Ol tutynýshynyń orta jasy, ol tutynýshynyń jynysy, onyń geolokasıasy, onyń sóıleıtin tili jáne t.b. san myńdaǵan tutynýshyny sıpattaıtyn qasıetter. Siz qalaısyz ba, qalamaısyz ba, ár bıznes sizdi ne myna, ne ana topqa qosyp, segmentasıany júzege asyrady. Mysalǵa, kaspı bankta kóbinese jeke tulǵalar, kazkombankta kóbinese bıznes, mekemeler, al Halyq bankta kóbinese zeınetkerlermen memlekettik mekemelerde isteıtin tutynýshylar qyzmet alady.
Sol sıaqty, vkontakte jelisi kóbinese mektepte jáne ýnıversıtette oqıtyn jasóspirimder bolsa, feısbýk jelisinde kóbinese eresek adamdar otyrady.
Minekeı, sáıkes túrde ár adam oryssha ne qazaqsha tańdaý arqyly, bankta qazaq jáne orys tildi tutynýshylardyń úlesi ózgerip otyrady. Al endi suraq, sizderdiń árqaısynyz orys tildi tańdaý arqyly banktaǵy tutynýshylardyń ishinde orys tildilerdiń úlesin 95% jetkizdińiz, al qazaq tildi tutynýshy 5% bolyp qaldy.
Bank qaı tutynýshynyń múddesin qorǵaýǵa tyrysady? Qaı toptyń pikirin qulaqqa asady?
"Qazaq tildi tutynýshysyń ba? Sen kimsiń, sen joq bolyp ketseń de, biz baıqamaı qalamyz", - deýi múmkin.
Shynymdy aıtsam ár bankpen til máselesi boıynsha kúresýden sharshadym. Óıtkeni olar maǵan statısıkany kórsetedi, 95% oryssha qoldanady, nesine sen basymyzdy qatyrasyń degendeı.
Sondyqtan, árdaıym bankomatqa barǵanda orys tilin tandaý arqyly, qazaq tiliniń úlesin ysyryp tastaǵanyńyzdy este saqtaǵanyńyz jón.
Osydan keıin qazaq tilin kompanıalar mensinbeıdi dep renjıtyn qazaqpyz ǵoı.
Jalpy, bul bankomatqa ǵana qatysty emes, barlyq qyzmet túrlerine qatysty.
Ǵanı Myrzamuratovtyń feısbýktegi jazbasynan
