Ortalyq kommýnikatsiia qyzmetinde prezident Toqaev Joldaýynyń negizgi baǵyttaryn tarqatyp ótken ministr osynaý zańnyń sońǵy 5 jyl kóleminde jumys istep kele jatqanyn aitty.
Balaevanyń atap ótkenindei osy zań aiasynda azamattar "Ashyq úkimet" portalynda erkin aqparat alyp ári ony taratýǵa múmkindik alǵan. Ázir portalmen bailanysty 4 platforma jumys istep tur.
Bular: ashyq derekter, Ashyq biýdjetter, Ashyq NQA jáne ashyq dialog tarmaqtary. Osynaý platformalarda 3,5 myńǵa jýyq jariialy memleket málimeti jinaqtalǵan. Budan bólek 74 myń biýdjettik baǵdarlama jobalary jariialanǵan.
Sonymen qatar dál osy arada 65 myń normativti-quqyqtyq aktiler bar. Sońǵy 5 jylda "Ashyq dialog" platformasy arqyly belgili bir salaǵa jaýap beretin basshylardyń blogyna 366 myńǵa jýyq ótinish túsken. Áitkenmen qoǵam tarapynan atalǵan portalǵa qatysty syn-eskertý de kóp.
Balaeva bul týraly egjei-tegjeili aitty.
"Naqty aitqanda keibir málimetterdi oqý yńǵaisyz, mátini uǵynyqsyz, saýaldarǵa keshigip jaýap beredi degen shaǵym jii túsedi. Prezidentimiz osyǵan orai aqparatqa qol jetkizý máselesi boiynsha qoldanystaǵy zańnamaǵa ózgeris engizý keregin atap ótken. Túzetýler 2 negizgi máseleni sheshýdi maqsat tutady. Bul: baqylaý men jaýapkershilikti kúsheitý. Ol úshin Aqparat jáne qoǵamdyq damý ministrligine jaýapty organnyń fýnktsiiasy beriletin bolady", – dedi ministr.
Óz kezeginde Toqaevqa aqparatqa qol jetkizýge qatysty júrgizilgen jumystyń jai-japsary baiandalyp, jyl saiyn esep berilip otyrady.
Balaeva óz tarapynan aqparat ielenýshilerge biznes sýbektileri jáne olardyń birlestikterin, memorgandardyń qyzmetin júzege asyratyn ózin-ózi retteitin jáne de úkimettik emes uiymdardy kirgizýdi usyndy.
"Qoldanystaǵy zańnamaǵa túzetýler ázirgi ýaqytta Májiliste qaralatyn aqparat máseleleri jónindegi zań jobasyna endi. Jyl sońyna deiin zań jobasy Prezidenttiń qol qoiýyna kirgizilýi qajet", – dedi vedomstva basshysy.
