Qazaqstanda baǵasy negizsiz joǵary kórsetilgen memlekettik satyp alýlar avtomatty túrde qabyldanbaıdy. Bul týraly Qarjy vıse-mınıstri Dáýren Keńbeıil málimdedi, dep habarlaıdy Dalanews.kz.
Onyń aıtýynsha, zańbuzýshylyqtardyń negizgi bóligi konkýrstyq qujattamany ázirleý barysynda bolady. Bul kezde taýarlarǵa qoıylatyn talaptar ádeıi kúrdelendirilip, olardyń quny qoldan joǵary kórsetiledi. Qazirgi kezde mundaı zańbuzýshylyqtar táýekelderdi basqarý júıesi men memlekettik aýdıt organdary arqyly qolmen tekserý nátıjesinde anyqtalyp otyr.
Bul prosesti avtomattandyrý maqsatynda Qarjy mınıstrligi baǵa derekterine baılanǵan ulttyq taýarlar katalogyn ázirlep jatyr. Atalǵan júıe iske qosylǵan soń, quny anomaldy túrde joǵary memlekettik satyp alýlar avtomatty túrde buǵattalyp, ornalastyrýǵa jiberilmeıdi.
