Qazaqstan Respýblikasynyń bokstan ulttyq qurama komandasynyń bas bapkeri, halyqaralyq dárejedegi sport sheberi, QR eńbek sińirgen jatyqtyrýshysy Myrzaǵali Aitjanov bokstaǵy sátsizdik úshin keshirim surap, kózine jas ala jazdady, - dep habarlaidy Dalanews.kz.
Bul týraly ol qazaqstandyq telearnalarǵa bergen suhbatynda aitty.
"Eldiń jankúierlerin túsinemin. Bizdiń jekpe-jekterge kóńilderi tolǵan joq. Sol úshin keshirim suraimyz. Eshkim utylamyn dep kelgen joq. Jigitterdiń bári baryn salyp, kúresti. Jaqsy daiyndyqpen keldik. Biraq sáttilik jetpedi dep oilaimyn, eshkimdi kinálamaimyn.
Bárin ózimizden kóremiz. Buiyrmai tur, kem-ketik bar shyǵar. Sol úshin jeńiske jetpegen shyǵarmyz. Biraq jigitterdiń bári sharshaǵan joq. Nebir sózder estip jatyrmyz. "Sharshady, dainydyq nashar" dep. Búkil álem, áriptesterim bizdiń balalarǵa riza bolyp otyr. Al bizdiń el bizdi dattap jatqanynda qalai el bolamyz dep oilaimyn. Al bylai bárine raqmet. Múmkin qatty eldiń namysyn oilap, solai aityp jatqan shyǵar. Biraq bári aman bolsyn. Qazaqpyz, bir-birimizdi osyndaida qoldamaǵanda qashan qoldaimyz?", - deidi Aitjanov.
Qazaqstan osymen ekinshi olimpiada qatarynan bokstan altynsyz qaldy.
Qazaqstan 2024 jylǵy jazǵy olimpiada oiyndaryna bokstan eki medal: kúmis jáne qolamen qaitty.
Aita keteiik, 2020 jyly Tokioda ótken jazǵy Olimpiada da qazaq boksy úshin sátsiz boldy. Sol jyly Qazaqstan bokstan eki qola medal (Sáken Bibosynov pen Qamshybek Qońqabaev) aldy.
Al 2016 jyly Rioda ótken Olimpiada oiyndarynda boksshy Daniiar Eleýsinov Qazaqstannyń qorjynyna altyn medal salǵan bolatyn.
Buǵan deiin belgili saiasatker, memleket qairatkeri, QR Eńbek sińirgen jattyqtyrýshysy Amalbek Tshan Qazaqstandaǵy bokstyń jai-kúiine bailanysty pikir bildirdi. Keńes Odaǵy kezinde bokstan gúrzi judyryǵymen qarsylastaryn talai márte sulatyp túsirgen ardager sportshy eldegi sport ahýalyn synap tastady.
