Bul týraly qalalyq kásipkerlik jáne indýstrialdy-innovatsiialyq damý basqarmasynyń basshysy Bereke Dúisebekov byltyrǵy atqarylǵan jumystar men biylǵy josparlar boiynsha ákimge esep berýi kezinde baiandady.
Megapolistiń óndiristik potentsialy negizinen, 5 óndiristik alańda shoǵyrlanǵan. Onda búginde 346 mlrd.teńgege 335 investitsiialyq joba iske asyrylyp, 14 myńnan asa jumys oryndary ashylýda. Qazir aimaqtardyń tolymdylyǵy 90 paiyzdan asqan.
Salada atqarylyp jatqan jumystarmen tanysqan qala basshysy kásipkerlikti qoldaý maqsatynda qolǵa alynǵan memlekettik baǵdarlamalardy tiimdi júzege asyrý úshin naqty usynystardy daiyndaýdy tapsyrdy.
Sonymen qatar búginde kásipkerlerdi qoldaýda týyndap otyrǵan máselelerdi sheshýdiń keshendi jol kartasyn ázirleýdi usyndy.
«Shymkent kásipkerlikti damytýda áleýeti joǵary qala bolyp tabylady. Sondyqtan, bul múmkindikterdi tiimdi paidalana bilýimiz kerek. Ol úshin eń aldymen, memlekettik baǵdarlamalardy sapaly, júieli oryndaý mańyzdy. Apta saiyn árbir baǵdarlamanyń oryndalýy boiynsha naqty nátijelerdi kórsetý qajet» - dedi qala ákimi Murat Áitenov.
Shymkentte jyl sońyna deiin negizgi kapitalǵa salynatyn investitsiia kólemi 722 mlrd. teńgeni quraidy. Ótken jyldarmen salystyrǵanda kórsetkish 3 ese artady dep kózdelýde.
