Májilis depýtaty Ashat Aimaǵambetov mektep-kolledjderge qatysty túitkildi máseleni kóterdi, - dep habarlaidy Dalanews.kz.
Onyń sózinshe, birneshe jyl buryn ministrlikte jumys istep júrgen kezinde kolledjder men mektepterge ózderiniń qosymsha tabystaryn, mysaly oqý barysynda jasalǵan ónimderden túsken kiristi damýyna, materialdar satyp alýǵa, qural-jabdyqty jańartýǵa, sheberhanalardy jabdyqtaýǵa paidalanýǵa múmkindik beretin normany engizgen.
"Bári túsinikti siiaqty. Qajet ári ádiletti sheshim. Biraq tájiribede túitkil kóp. Mysaly dánekerleýshi mamandyǵynda oqityn kolledj stýdentteri sabaq barysynda temirden buiymdar jasaidy: qaqpa, oryndyq, tor. Aspaz bolýǵa oqyp júrgender nan, bálish, tort pisiredi. Bulardyń bári - oqý úderisiniń bir bóligi. Bul biznes emes, tabys tabý úshin emes. Jai ǵana balalar qolymen jumys istep, úirenip jatyr", - dedi ol.
Depýtat bul ónimderdi satýǵa shyǵaryp, túsken qarjyny qaitadan oqý protsesine baǵyttaýǵa bolatynyn, biraq jergilikti jerlerde kedergi baryn jetkizdi.
"Keibir antimonopoliialyq organdar muny kásipkerlikpen básekelestik dep qabyldaidy. Al shyn máninde bul bizneske kedergi emes. Kerisinshe erteń sol kásiporyndarda, naýbaihanalarda, tsehtarda jumys isteitin bolashaq mamandardy daiyndaýǵa kómektesedi", - dedi ol.
Ashat Aimaǵambetov mektep sport zaldaryna qatysty da osyndai jaǵdai kezdesetinin aitty.
"Biz birneshe jyl buryn mektepterdiń sport zaldaryn sabaqtan tys ýaqytta sektsiialar men úiirmelerge, jergilikti qaýymdastyqqa jalǵa berýge ruqsat bergenbiz. Qarajat tikelei mekteptiń shotyna túsedi. Biraq munda da bóget. Jergilikti antimonopoliialyq organdar muny da kásipkerlikpen básekelestik dep qabyldaidy. Osy máseleni áriptestermen birge talqyladyq. Sheshimi bar. AZRK ókilderi máseleni sheshemiz dep ýádelerin berip ketti", - dedi depýtat.
