Quqyq qorǵaýshy, zańger Aigúl Orynbek Ulttyq quryltaidan shyǵaryldy, dep habarlaidy Dalanews.kz
Sonymen qatar, Ulttyq quryltai quramynan L.Tarakov (qaitys bolýyna bailanysty), B.Qaniev, Q.Bisenov, S.Sádýaqasov, M.Jabaǵin shyǵarylǵan.
Aigúl Orynbek áleýmettik jelide jazba jariialady.
"Iá, iyǵymnan aýyr júk tústi! Halyqtyń senimin arqalap júrý qur sóz emes, bul - úlken jaýapkershilik. 2019 jyly Prezident Qasym-Jomart Toqaev Ulttyq qoǵamdyq senim keńesin qurdy. Sol kezde meni qoǵamda azamattyq ustanymyn ashyq aityp júrgen belsendi qairatker retinde keńes quramyna shaqyrdy. Jai otyrǵan joqpyn. Únsiz qalǵan joqpyn. Aýyl-aimaqtyń shynaiy máselelerin ashyq aityp, óńirlerdegi túitkildi túiinderdi tik kóterdim. Birqatar usynystarym Memleket basshysynyń tarapynan qoldaý tapty. Bul — men úshin ǵana emes, el úshin jasalǵan igi is boldy. 2022 jyly Ulttyq keńestiń ornyna Ulttyq quryltai quryldy. Bul jańa alań — halyqtyń, qoǵam belsendileriniń únin estitin, pikirin tyńdaityn ashyq dialog alańyna ainaldy. Bul jerde laýazym da joq, mansap ta joq.
Bul — qoǵamdyq missiia. Búgin sen bolsań, erteń ózge azamat keledi — bul zańdylyq. Rotatsiia — tazalyq. Jańarý — damý! Qoǵam tek bir adamnan turmaidy. Basqa azamattarǵa da múmkindik berilýi kerek. Bundai jaýapkershilikti júkti kóterip júrý ońai emestigin de basqalar seziný kerek. Men 20-30 jyl bir orynda tapjylmai otyratyn tiran emespin. Ýaqytymen kelip, ýaqytymen ketýdi bilý — bul parasat! Maǵan senip, Ádiletti Qazaqstan úshin úmit artqan halyqtyń senimin aqtadym dep oilaimyn. Men eshqashan únsiz qalǵan emespin, qalmaimyn da! Qoǵam úshin kúres bir keńeste otyrýmen shektelmeidi. Bul — ómir boiǵy missiia", - dep jazdy ol.
Eske salaiyq, buǵan deiin Aigúl Orynbek úlken kompaniialar tender arqyly otandyq ónim dep kórsetip, biraq Qytaidyń ónimin arzan baǵaǵa alyp kelip, emblemasyn aýystyryp, memleketti aldap otyrǵanyn málimdedi.
