Jańa "Otbasylyq-turmystyq zorlyq-zombylyq týraly zańmen" qylmystyq, qylmystyq-protsestik kodekster men ákimshilik kodeksterge túzetýler engizildi. Osy tusta QR IIM Ákimshilik politsiia komiteti tóraǵasynyń orynbasary Renat Zýlhairov áieline qol kóterip, densaýlyǵyna ziian keltirgender qandai jazaǵa tartylatynyn jetkizdi, dep habarlaidy Dalanews.kz.
Budan bylai áieliniń densaýlyǵyna jeńil ziian keltirgender de jazadan sytylyp kete almaidy.
"Endi densaýlyqqa jeńil ziian keltirgeni úshin 200 qoǵamdyq jumysqa jegilip, 50 táýlikke qamaýǵa alynady. Eger jábirlenýshi quqyqbuzýshyǵa táýeldi jaǵdaida bolǵanda tipti 2 jylǵa bas bostandyǵynan aiyrý sharasy qarastyrylǵan. Uryp-soqqany úshin 80 AEK kóleminde aiyppul tóleidi nemese 25 táýlikke qamaýǵa alynady", — dedi Renat Zýlhairov.
Eske salaiyq, osy jyldyń sáýirinde memleket basshysy Qasym-Jomart Toqaev "Qazaqstan Respýblikasynyń keibir zańnamalyq aktilerine áielderdiń quqyqtary men balalardyń qaýipsizdigin qamtamasyz etý máseleleri boiynsha ózgertýler men tolyqtyrýlar engizý týraly" jáne "Qazaqstan Respýblikasy Ákimshilik quqyq buzýshylyq týraly kodeksine áielderdiń quqyqtary men balalardyń qaýipsizdigin qamtamasyz etý máseleleri boiynsha ózgerister men tolyqtyrýlar engizý týraly" Qazaqstan Respýblikasynyń zańdaryna qol qoiǵan edi.
Áielder men balalarǵa qatysty kez kelgen sipattaǵy zorlyq-zombylyq úshin jaýapkershilikti qatańdatatyn, sondai-aq otbasy institýtyn, kámeletke tolmaǵandardyń qaýipsizdigin nyǵaitatyn normalar engizildi:
densaýlyqqa qasaqana jeńil ziian keltirý jáne uryp-soǵý qylmystyq quqyq buzýshylyq retinde tanyldy. Densaýlyqqa qasaqana aýyrlyǵy ortasha jáne aýyr ziian keltirýge qatysty jaýapkershilik qatańdatyldy;
neke jáne otbasy, áke bolý, ana men bala institýtyn nyǵaitýǵa negizdelgen neke jáne otbasy zańnamasynyń jańa qaǵidattary, sondai-aq jalpyadamzattyq, ulttyq, dástúrli, mádeni, otbasylyq qundylyqtardy qurmetteý negizinde balalardyń adamgershilik, rýhani tárbiesin qamtamasyz etý qaǵidaty qarastyrylǵan;
otbasy, áielder men balalardyń quqyqtaryn qorǵaý máseleleri jónindegi bailanys ortalyǵy qyzmetiniń quqyqtyq negizderi jasaldy. Onyń rólin aqparattandyrý salasyndaǵy ýákiletti organ aiqyndaityn zańdy tulǵa atqarady. Bul rette memlekettik organdar otbasy, áielder men balalardyń quqyqtaryn qorǵaý máseleleri boiynsha ózara áreket etip qana qoimai, bailanys ortalyǵyna azamattardyń ótinishterin qaraý nátijesinde qabyldanǵan sharalar týraly aqparat berýge mindetti bolady;
turmystyq zorlyq-zombylyqtan zardap shekkenderge arnaýly áleýmettik qyzmet kórsetý úshin otbasyn qoldaý ortalyqtaryn qurýǵa jáne olardyń jumysyna qatysty máseleler zańnamalyq turǵydan bekitildi;
ózin-ózi óltirýge itermelegeni jáne yqpal etkeni, sondai-aq ózin-ózi óltirýdi nasihattaǵany úshin qylmystyq jaýapkershilik engizildi;
16 jasqa tolmaǵan adamdarǵa seksýaldyq sipatta tiiskeni úshin qylmystyq jaýapkershilik engizildi. Kámeletke tolmaǵandardy urlaǵany jáne zańsyz bas bostandyǵynan aiyrǵany úshin jaza aitarlyqtai qatańdatyldy;
kámeletke tolmaǵandardy jábirlegeni (býlling, kiberbýlling) úshin ákimshilik jaýapkershilik alǵash ret engizildi;
bilim berý uiymdary kámeletke tolmaǵandar jasaǵan nemese olarǵa qatysty jasalǵan zańǵa qaishy áreketter týraly quqyq qorǵaý organdaryna dereý habarlaýǵa mindetti;
16 jasqa deiingi balalardyń qaýipsizdigin qamtamasyz etý maqsatynda jol aqysyn tólemegeni úshin olardy qoǵamdyq kólikten májbúrlep túsirýge tyiym salyndy.
Zańdardyń mátini baspasózde jariialanady.
