Elimizde 10 sotyq jer kimge jáne qalai berilýi tiis ekeni zańda naqty kórsetilmegen. Bul týraly Jer reformasy jónindegi komissiianyń Kókshetaýdaǵy kóshpeli otyrysynda saiasattanýshy Aidos Sarym málimdedi.
«Búgin osy komissiianyń múshesi Dáýren Babamuratov degen baýyrymyz qońyraý shaldy. Alataýdyń Halyqqa qyzmet kórsetý ortalyǵyna 200-den astam adam 10 sotyq jer alýǵa kelipti. Shynyn aitý kerek, halyq jer alýǵa quqylymyz, jurttan estidik dep júr. Osy kezge deiin bul jóninde aýyl sharýashylyǵy ministrligi, basqalar da aityp keldi. Biraq naqty eshteńe joq. Bálkim bul aqparatty bireý taratyp, ýshyqtyryp júrgen shyǵar», — dep atap ótti komissiia múshesi.
Aidos Sarymnyń aitýynsha, zańda jer kimge, qalai berilýi tiis ekeni naqty kórsetilmegen.
«10 sotyq degen máselege keleiikshi, bul endi taza zańdaǵy popýlistik bap sekildi. Sebebi, ol jer kimge berilýi tiis, qalai berilýi tiis ekeni belgisiz. Ár adamǵa 10 sotyq beremiz deitin bolsaq, úkimettiń qoryndaǵy jer jetpeidi jáne onsha kólemde infraqurylym tartylǵan jer joq. Shynyn aitý kerek qoi, Almatyda, Astanada, myna Kókshetaýda jurtqa beretin jer joq. Iaǵni, bul máseleniń anyq-qanyǵyna jetip, durystap qolǵa alý kerek sekildi, moratorii engizip, toqtata turý kerek pe… Sebebi azamattar arasynda jurt 100 myńdap alyp jatqanda, nege 10 sotyq ala almaimyn degen áńgime bolady. Qoǵamtanýshy, áleýmettanýshy retinde aitarym, bul endi taza daý-janjaldyń oshaǵy. Qazir ákimdikterdiń halyqpen tildesýge, túsindirýge múmkindigi bar. Al erteń 5-10 myń adam jetip kelse, olarǵa ákimdik basý aita ala ma, joq pa, belgisiz. Sondyqtan úkimet tarapynan osy máselege toqtaý bolatyn sheshim qabyldaný kerek», — dep tolyqtyrdy qoǵamtanýshy.+
Sonymen qatar, ol jer máselesindegi ashyqtyqty qamtamasyz etý kerek degen pikirde.
«Qazaqstandaǵy jer ielenip otyrǵan iri tulǵalardyń tizimi jáne taǵy basqa qoǵamdy alańdatyp otyrǵan máselelerge jaýap bermei, bizdiń komissiianyń jumysy alǵa baspaidy. Aýyl sharýashylyǵyna jańa kózqaras qalyptastyrýymyz qajet», — dep túiindedi Aidos Sarym.
