Ishki ister ministriniń birinshi orynbasary Marat Qojaev Aidos Sadyqovqa shabýyl jasaǵan kúdiktilerge bailanysty pikir bildirdi, dep habarlaidy Dalanews.kz.
"Kúdikti Jaqanbaev tergeý organdaryna ózi berildi me?", - dep surady BAQ ókilderi.
Sadyqovtyń sózinshe, tergeý amaldary áli de júrip jatyr.
"Arnaiy prokýrorlar osy ispen ainalysyp otyr. Ishki ister ministrligi qazir jedel izdestirý qyzmetimen ainalysyp jatyr. Al ekinshi kúdikti Meiram Qarataevty izdestirý jumystary jalǵasýda", - dep jaýap berdi Qojaev.
Eske salaiyq, 18 maýsymda Kievte "BASE" basylymynyń basshysy Aidos Sadyqovqa qastandyq jasalǵan bolatyn.
Bul týraly ýkrainalyq BAQ-tar habarlai bastady.
"Aldyn ala boljam boiynsha, Kievte Aidos Sadyqovqa qastandyq jasaldy. Ol - qazaqstandyq jýrnalist, "BASE" oppozitsiialyq internet portalynyń basshysy. Jaǵdaiy aýyr", - dep jazylǵan "BAIRAKTAR NEWS" telegram arnasynda.
Buǵan deiin telegram arna Kievtiń Shevchenskii aýdanynda atys bolǵanyn jazǵan. Basylym málimetinshe, turaqta turǵan kólikte er adam áielimen otyrǵan. Belgisiz bireý kelip, er adamdy atyp jiberip, qashyp ketken. Áiel adam jaraqat almaǵan.
Aidos Sadyqov Ýkrainada resmi bosqyn mártebesin alǵan. Al 2023 jyldyń qazan aiynda Sadyqovqa Qazaqstanda "áleýmettik, ulttyq, rýlyq, tektik-toptyq nemese dini alaýyzdyqty qozdyrǵany" úshin izdeý jariialanǵan bolatyn.
Buǵan deiin Ermurat Bapi Aidos Sadyqovty jaqsy biletinin, al "Báse" qatardaǵy oppozitsiialyq resýrs ekenin aitty. Sondai-aq, depýtat bul qastandyqqa Qazaqstan biliginiń reaktsiiasy jóninde, Qazaqstannyń endigi áreketi qandai bolatyny týraly pikir bildirdi.
"Sadyqovtardyń kásibi, saiasi kózqarasy qalai bolǵany mańyzdy emes. Eń mańyzdysy ol - Qazaqstan azamaty. Qai jerden baryp saiasi baspana alsa, ol - ekinshi kezektegi másele. Sondyqtan Qazaqstannyń biligi, Qazaqstannyń tiisti memlekettik organdary Ýkraina tarapyna shyǵyp, bul máselege aralasýy kerek, suraý salýy kerek. Bul halyqaralyq dárejede rezonans alǵan oqiǵa ǵoi. Bir eldiń azamatyn ekinshi bir elde atyp ketý degen, onyń ústine jýrnalist bolsa, oppozitsiialyq resýrstyń jetekshisi bolsa, mindetti túrde Qazaqstannyń tarapy aralasýy kerek. Ekinshiden, Qazaqstannyń buǵan eshqandai da qatysy joq ekenin dáleldeýi kerek qoi. Qazaqstan tarapy únsiz qalatyn bolsa, onda basqa da pikir týýy múmkin. Qazaqstannyń biligi bul iske mindetti túrde aralasyp, istiń mán-jaiyn bilýge áreket etýi kerek degen oiym bar", - dedi Bapi.
Al Prezident Qasym-Jomart Toqaev Qazaqstan bul is boiynsha tergeýge qatysýǵa daiyn ekenin aitty.
"Elimizde Zań ústemdigin nyǵaityp jatyrmyz, iaǵni barlyq salada, eń aldymen, Zań ústemdigin qamtamasyz etý – basty mindet. Bul másele boiynsha meniń kózqarasym – aiqyn. Muny ózderińiz de jaqsy bilesizder. Qazaqstanda Zań men tártip bárinen biik turýǵa tiis. Sondyqtan qoǵamdaǵy barlyq qarama-qaishylyqtar men kelispeýshilikterdi tek qana quqyqtyq turǵydan, iaǵni tiisti Zańnamaǵa jáne negizgi halyqaralyq normalarǵa sáikes sheshý qajet. Keshe Qazaqstan azamaty Aidos Sadyqovqa qatysty Kievte bolǵan qylmysqa da dál osy ustanym turǵysynan qaraǵan jón. Men diplomatiialyq arnalar men quqyq qorǵaý organdary arqyly osy oqys oqiǵa boiynsha resmi suratýlar jiberý týraly naqty tapsyrma berdim. Sondai-aq qajet bolǵan jaǵdaida Qazaqstannyń resmi organdary istiń aqiqatyna jetýge járdem berý úshin tergeý jumysyna qatysýǵa daiyn ekenin aitqym keledi, – dedi Prezident."
