Prezident Qasym-Jomart Toqaevtyń Frantsiiaǵa memlekettik sapary qarsańynda QR Mádeniet jáne aqparat ministri Aida Balaeva Parijdegi IýNESKO-nyń shtab-páterinde bolyp, uiymnyń Bas direktorynyń mádeniet jónindegi orynbasary Ernesto Ottonemen kezdesý ótkizdi, – dep habarlaidy Dalanews.kz.
Kezdesýde Aida Balaeva IýNESKO-men birlesken jobalar QR Mádeniet jáne aqparat ministrligi úshin basym baǵyttardyń biri ekenin aitty.
– Qazaq mádeni murasyn keńinen nasihattaý maqsatynda kitaptardy aýdarý jáne birlesip shyǵarý salasynda tabysty yntymaqtastyq ornatýǵa bolady. Men IýNESKO jobalarynyń, sonyń ishinde birge atqarǵan jobalardyń sátti júzege asyrylýy úshin barlyq kúsh-jigerimdi salamyn, – dedi Aida Balaeva.
Taraptar Qazaqstan men IýNESKO arasyndaǵy mádeni yntymaqtastyqtyń negizgi baǵyttaryn, atap aitqanda, Dúniejúzilik mádeni mura eskertkishterin qorǵaý, materialdyq emes mádeni murany zertteý jáne nasihattaý, kreativti indýstriialardy damytý máselelerin talqylady.
– Kezdesý Qazaqstanmen Dúniejúzilik mádeni mura, materialdyq emes murany saqtaý, sondai-aq kreativti indýstriialar boiynsha júrgizilip jatqan túrli jobalardy talqylaý turǵysynan óte nátijeli boldy. Keiingi jyldary birlesken jumys óte belsendi júrip jatyr. Ásirese, IýNESKO men Qazaqstannyń jobalary aiasyndaǵy jumystardyń ilgerileýi baiqalady, – dedi Ernesto Ottone.
Kezdesý sońynda Aida Balaeva Ernesto Ottonege qazaqstandyq mádenietti jahandyq deńgeide nasihattaý jáne IýNESKO-ǵa múshe memleketter arasynda birlesip dialog qurý jolyndaǵy jemisti jumysy úshin alǵys bildirdi.
