Qazaqstanda Halyqaralyq balalardy qorǵaý kúni qarsańynda «Qazaqstan balalary» atty ulttyq naýqan bastaldy. Bul týraly QR Mádeniet jáne aqparat ministri Aida Balaeva óziniń beineúndeýinde málimdedi, – dep habarlaidy Dalanews.kz
Ministrdiń aitýynsha, onkúndik Memleket basshysynyń tapsyrmasyna sáikes «Otbasy – tárbie bastaýy!» uranymen ótýde. Bul bastama arqyly memleket bala tárbiesindegi otbasylyq qundylyqtarǵa, ata-ana men balanyń ózara túsinistigine basa nazar aýdarýdy kózdep otyr.
"Qurmetti dostar!
Barshańyzdy aldaǵy Halyqaralyq balalardy qorǵaý kúnimen shyn júrekten quttyqtaimyn!
Mereke qarsańynda Memleket basshysynyń tapsyrmasyna sáikes «Otbasy – tárbie bastaýy!» uranymen onkúndik bastaldy. Óitkeni bala tárbiesinde sheshýshi ról atqaratyn – otbasy. Dál osy ortada tulǵanyń qabileti damyp, bolmysy qalyptasady.
Prezidentimiz balalardyń sapaly bilim alýy men tárbiesine memleket pen ata-ananyń ortaq jaýapkershiligi mańyzdy ekenin únemi aityp keledi. Sotsiologiialyq zertteýlerge sáikes, azamattardyń 90%-y ata-ana bolýdy ómirindegi eń mańyzdy qundylyq dep sanaidy. Al 85 paiyzy ata-ana men bala arasyndaǵy ózara túsinistikti – otbasylyq ál-aýqattyń negizgi sharty retinde kóredi.
Memleket ár bala tek úide ǵana emes, qoǵamda da qamqorlyq pen súiispenshilikke bólenýi úshin barlyq jaǵdaidy jasap keledi. Bul baǵytta Áielder isteri jáne otbasylyq-demografiialyq saiasat jónindegi ulttyq komissiia men Mádeniet jáne aqparat ministrligine mańyzdy mindetter júktelgen.
Ulttyq komissiianyń «One-Stop-Service» jobasy aiasynda balalarǵa qatysty seksýaldyq zorlyq-zombylyq oqiǵalaryn qamtityn 50-ge jýyq qylmystyq is qaralyp, 700-den astam áiel men balaǵa jedel kómek kórsetildi.
Shalǵai óńirlerge qyzmet kórsetken «Salamatty Qazaqstan» poiyzy 100 myńnan astam azamatty qamtydy. Ásirese kópbalaly analar men múmkindigi shekteýli balalardy tárbielep otyrǵan áleýmettik osal otbasylarǵa erekshe nazar aýdaryldy. Sondai-aq, balalardyń tsifrlyq qaýipsizdigi men sýitsidtiń aldyn alý boiynsha naqty bastamalar júzege asýda", - dedi ministr.
Sondai-aq, Memleket basshysy Qasym-Jomart Toqaev tóraǵalyq etken Úshinshi Ulttyq Quryltaida berilgen tapsyrmaǵa sáikes, Úkimet «Qazaqstan balalary» biryńǵai baǵdarlamasyn ázirlep jatyr. Bul – balalardyń ózekti máselelerin sheshýge arnalǵan, zamanaýi syn-qaterlerge jaýap beretin tutas ulttyq júie bolmaq.
Biyl Mádeniet jáne aqparat ministrligi «Ata-ana akademiiasy» jobasyn iske qosty. Jaqyn arada arnaiy onlain platforma iske qosylyp, ata-analarǵa arnalǵan bilim berý jáne tájiribe almasý múmkindigi usynylady.
Beineúndeý sońynda Aida Balaeva barlyq ata-analardy balalardyń qyzyǵýshylyqtary men muqtajdyqtaryna kóbirek kóńil bólýge shaqyryp, barsha otbasylarǵa baqyt pen bereke tiledi.
"Baqytty ári deni saý urpaq – elimizdiń basty maqtanyshy jáne memleketimizdiń órkendeýiniń shynaiy kórsetkishi. Merekede barlyq otbasyǵa baqyt pen bereke, januia jylýyn tileimin", - dedi Aida Balaeva.
