Búgin QR Mádeneıt jáne aqparat mınıstri Aıda Balaeva qolyna qalam ustaǵan jýrnalıser qaýymyn Ulttyq basylym kúnimen quttyqtap, óziniń Feısbýktaǵy praqshasynda jazba qaldyrdy, – dep habarlaıdy Dalanews.kz.
Barsha áriptesterimdi Ulttyq basylym kúnimen quttyqtaımyn!
Qazaq baspasóziniń taǵylymǵa toly tarıhynda bul kúnniń mańyzy bólek. Sebebi dál osy kúni Álıhan Bókeıhanuly, Ahmet Baıtursynuly, Mirjaqyp Dýlatuly sekildi ult zıalylarynyń esimimen ushtasyp jatqan «Qazaq» gazetiniń alǵashqy sany jaryq kórdi. Sondyqtan, ótken jyly Úkimet qaýlysymen 2 aqpan – Ulttyq basylym kúni bolyp bekitilýiniń ózindik sımvoldyq máni bar dep bilemiz.
Ult múddesin qorǵaýda ulttyq-saıası minberge aınalǵan «Qazaq» gazeti bolashaqqa degen uly murat jolynda barsha halyqtyń basyn biriktirdi. Ulttyq birlik pen yntymaqtyń eren úlgisin kórsetip, qazaq qoǵamynnyń rýhanı kemeldenýine aıryqsha yqpal etti.
Memleket basshysy «Otandyq baspasóz elimizdiń tutastyǵy men tatýlyǵyn nyǵaıtý jolynda eleýli ról atqarady» dep atap ótkenindeı, baspasóz qashan da ulttyń úni, memlekettigimizdiń tuǵyry ispetti.
Mádenıet jáne aqparat mınıstrligi merzimdi basylymdarǵa udaıy qoldaý kórsetip keledi.
1991 jyly elimizde tek 10 respýblıkalyq gazet pen jýrnal jaryq kórip, 21 tele jáne radıoarna efırge shyqsa, 2024 jylǵy qańtardaǵy esep boıynsha Qazaqstanda 5 804 BAQ tirkelgen, onyń 3 985-i merzimdi baspasóz basylymy, 212-i telearna, 90-y radıo, 1 222-i aqparattyq agenttikter jáne jelilik basylymdar.
Gazet-jýrnaldarǵa jazylý isi de ońtaılandyrylyp, "Qazposhta" jáne Kaspi Bank qosymshalary arqyly onlaın-jazylý jumystary júıelendi.
Ótken jyly aımaqtardaǵy merzimdi basylymdarynyń jumys deńgeıin arttyrý maqsatynda uıymdastyrylǵan óńirlik BAQ forýmy bıyl da jalǵasyn tabady.
Álemde bolyp jatqan jańa trendterge qaramastan, merzimdi basylymdardyń jóni bólek, mańyzy erekshe. Sol sebepti, ulttyq medıany damytý, básekege qabiletti buqaralyq aqparat quraldaryn qalyptastyrý, jýrnalıserdiń mártebesin arttyrý – negizgi maqsattarymyzdyń biri. Aldaǵy ýaqytta osy baǵytta bárimiz birlese jumys isteı beremiz dep oılaımyn.
Sondyqtan osy salaǵa qatysy bar barsha qyzmetkerlerdi Ulttyq baspasóz kúnimen taǵy da quttyqtaımyn! Sizderge shyǵarmashylyq tabys pen sarqylmas shabyt tileımin!
