Kezdesýde qor qarajatynyń qaida jumsalatyny sóz boldy. Pandemiia kezindegi medsaqtandyrýdyń jumys júiesi baiandaldy.
Jumaǵulov áleýmettik jelide taraǵan áýlettegi kólik sanyna qatysty málimetke pikir bildirip, munyń osydan 13 jyl buryn, 2007 jyly bolǵanyn, ol kezde memqyzmette jumys istemegenin aitty.
Al jazbanyń ózi zamannyń keń kezinde osydan 4 jyl buryn jariialanǵan eken.
"Indet kezinde halyqtyń toi-tomalaq pen syi-siiapatty oilaityn murshasy joq. Soǵan qaramai keibireýler áleýmettik jelide osydan 4 jyl buryn jariialanǵan jazbany taýyp alyp, jurttan súiinshi surapty. Bul tyrnaq astynan kir izdeý. Iá, halyqtyń narazylyǵyn túsinemin, mundai dúnie meniń de ashý-yzama tier edi. Áitkenmen bul óte uiat áreket. Bizdiń otbasyda tek bir kólik bar", – deidi Jumaǵulov.
Tóraǵanyń aitýynsha áieline bir sátte birneshe kólik ápermegen, olardy ýaqyt óte aýystyryp otyrǵan.
"Otasqanymyzǵa 25 jyl toldy. Kólik aýystyrý da zańdylyq qoi" deidi Jumaǵulov.
Saqtandyrý qorynyń basshysy halyqtan qashpaitynyn, dialog ornatýǵa ázir ekenin aitady.
Budan buryn belsendi Gúlbaný Ábenova Facebook áleýmettik jelisindegi paraqshasynda Meditsinalyq saqtandyrý qorynyń basshysy Aibatyr Jumaǵulovtyń áieliniń jeke paraqshasynan skrinshottar jariialaǵan.
"Al osy ýaqytta Meditsinalyq saqtandyrý qory basshysynyń baibishesi óziniń jazylýshylarynyń aldynda kúieýiniń ýáde bergen 10 kólik emes, 12 kólik syilaǵanyn aityp maqtanyp jatyr", - dep jazdy Gúlbaný Ábenova.
Bul ÁMSQ basshysy jubaiynyń kópshiliktiń nazaryna ilikke birinshi jazbasy emes, deidi Gúlbaný Ábenova. Belsendiniń aitýynsha, ol 2 aidan beri qordyń jumysyn qadaǵalap keledi. Buǵan deiin Gúlbarshyn Zairova áleýmettik jelilerde ulken úiin kórsetip, maqtanǵan. Jeli qoldanýshylarynyń narazylyǵynan keiin habarlama joiylyp, jýrnalist pen telejúrgizýshi Gúlbarshyn Zairovanyń paraqshasy Instagram-nan joǵalyp ketti. Bul joly da dál solai boldy. Telejúrgizýshiniń paraqshasyn tabý múmkin bolmady.
Biraq saqtalǵan skrinshottarda ÁMSQ basshysynyń jubaiy Gúlbarshyn Zairova óziniń jeke ómiriniń egjei-tegjeilerimen bólisken. Onyń belgili respýblikalyq arnanyń telejúrgizýshisi ekeni belgili.
