Áielin óltirdi dep aiyptalyp otyrǵan eks-ministr Qýandyq Bishimbaevqa qatysty sot jaryssózi jalǵasyp jatyr. Sot jaryssózinde prokýrorlar da, jábirelenýshi tarap ta, aiyptalýshy tarap ta sóz sóiledi. Sonyń biri - Bishimbaevtyń anasy Almira Nurlybekova. Ol - ulyna qatysty qylmystyq iste qoǵamdyq qorǵaýshy, - dep habarlaidy Dalanews.kz.
Sot jaryssózinde Bishimbaevtyń anasy kózine jas alyp, uly úshin duǵa jasaitynyn jetkizdi.
"Ana retinde ulyma duǵa jasaimyn. Ol tragediiaǵa ainalǵan áreket jasady. Qýandyq jazaǵa laiyq, degenmen ol istegen áreketine sáikes qana jazaǵa laiyq. Jábirlenýshi taraptyń advokaty sóz sóilegen kezde ulymdy jaman jaǵynan sipattady. Bul alqabilerge jasalǵan qysym dep esepteimin. Jábirlenýshi taraptyń advokaty Qýandyqty qoǵamnyń paraziti, eski Qazaqstannyń ókili dep atady, meniń ulym eldi 30 jyldan asa ýaqyt bilegen sheneýnikter úshin jazalanýy kerek dep esepteitinin de aitty. Keshegi sot jaryssózinde jábirlenýshi tarap bul protses ony qarap otyrǵandarǵa jáne Qazaqstannyń elitasyna sabaq bolsyn dedi. Tek birnárse suraimyn: búkil qoǵamnyń kúnásin bir adamǵa - meniń ulym Qýandyqqa artyp qoimasańyzdar eken deimin. Ádil bolyp, aiaýshylyq tanytýlaryńyz suraimyn", - dedi Bishimbaevtyń anasy.
Sonymen qatar, ol uly qai tusta kináli emes ekenin aitty.
"Ulymdy aqtap turǵan joqpyn, áreketin de aqtamaimyn. ...Qol kótergeni úshin, agressiia men shydamsyzdyq tanytqany úshin jazasyn alsyn, biraq ol qasaqana kisi óltirgen joq. Sondyqtan ádeii adam óltirý áreketi boiynsha jaza arqalamaýy kerek, - dedi ol.
Bishimbaevtyń anasy sóz arasynda qazaqstandyqtardan keshirim surady.
"Barlyq analardan, barlyq qyzdar men arýlardan ulym Qýandyq úshin keshirim suraimyn. Meni de keshirińizder. Maǵan óte aýyr. Saltanat qaza tapqan kúnnen beri maǵan da ońai emes. Eń aldymen Saltanattyń anasy men ákesinen, jaqyndarynan keshirim suraimyn", - deidi Almira Bishimbaeva.
Aita keteiik, Astana qalasynyń mamandandyrylǵan aýdanaralyq sotynda Qýandyq Bishimbaevqa qatysty qylmystyq is boiynsha birneshe sot otyrysy ótti. Ony dúiim jurt Joǵarǵy sottyń YouTube kanalynan onlain tamashalady.
Azamattyq nekedegi áieli Saltanat Núkenovany óltirdi degen aiyppen sottalyp jatqan eks-ministr Qýandyq Bishimbaevty advokat Leila Ramazanova, Nazken Qusaiynova, Erlan Ǵazymjanovtar qorǵap jatyr.
Al marqum Saltanat Núkenovanyń aǵasy Aitbek Amangeldi men onyń otbasynyń advokattary – Janna Orazbahova men Áliia Omarova.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy:
- asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý);
- qinaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
Qýandyq Bishimbaevqa qatysty 24 sáýirde ótken sot otyrysynda sot tergeýi aiaqtalǵany belgili boldy. Endigi kezek sot jaryssózinde. Aita keteiik, Bishimbaevqa qatysty sot jaryssózi erteń de jalǵasady.
