Áigili «volonter» Perizat Kairat pen anasy Ǵaini Alashbaevaǵa qatysty is boiynsha sotta zardap shekkender sóz aldy. 47 adamnan turatyn jábirlenýshiler toby alaiaqtyqpen jymqyrylǵan qarajatty qaitarýdy talap etip otyr. Aiyptaý tarapynyń dereginshe, bul qarjy qaiyrymdylyq maqsatqa – reabilitatsiialyq ortalyq qurylysyna, Palestina halqyna jáne sý tasqynynan zardap shekkenderge kómekke jinalǵanymen, shyn máninde, kúdiktilerdiń sán-saltanatqa toly ómirine jumsalǵan, dep habarlaidy Dalanews.kz.
Sotta alǵash bolyp sóz alǵan «Stroikonstrýktsiia» AQ-nyń zań keńesshisi Ǵaliia Isaeva kompaniianyń BizBirgemiz Qazaqstan 2030 qoryna sý tasqynynan zardap shekkenderge kómektesý úshin 200 myń teńge aýdarǵanyn málimdedi.
«Qazir jurt bul ekeýin «beldemshe kigen Ostap Bender» dep atap júr, keibiri atyshýly alaiaq Sonka Zolotaia Rýchkamen salystyrady. Árine, árkimniń óz pikiri bar. Degenmen qylmystyq is materialdarymen tanysyp, prokýrordyń sózin tyńdaǵannan keiin Perizat Kairat pen anasy Ǵaini Alashbaevanyń qylmys jasaǵany tolyq dáleldendi dep sanaimyn. Sondyqtan olarǵa zańnyń eń qatal talabyn qoldanýdy suraimyn», – dedi Ǵaliia Isaeva.
Al Nazarbaev Ziiatkerlik mektebiniń ókili bolsa, Perizat Kairattyń áreketi qoǵamda volonterler men qaiyrymdylyq uiymdaryna degen senimdi kúiretip, Qazaqstannyń halyqaralyq bedeline de nuqsan keltirgenin atap ótti.
«Olarǵa zań boiynsha qatań jaza berilýi kerek. Munda áńgime tek alaiaqtyq nemese qarjylyq shyǵyn jaily emes. Bul jerde elimizdiń álemdik deńgeidegi bedeline soqqy jasalyp, azamattardyń bir-birine degen senimi buzyldy. Volonterlerge degen teris kózqaras qalyptasty. Biz úshin 901 855 teńge – asa úlken soma bolmaýy múmkin, biraq bul – balalardyń aqshasy, NZM oqýshylarynyń ata-anasy jinaǵan qarajat. Sondyqtan balalar ádildik bar ekenin, jasaǵan ár isiń úshin jaýap berýge týra keletinin túsinýi tiis», – dedi mektep ókili.
Iske qatysy bar taǵy bir azamat Oljas Sadyq bloger Nazim Misanovpen birge 83 mln teńge jinap, Perizatqa aýdarǵanyn aityp, onyń kinási tolyq dáleldengenin atap ótti.
«Meniń azamattyq talap-aryzymdy qanaǵattandyrýdy suraimyn. Prokýrordyń Perizatqa suraǵan jazasyn qoldaimyn, biraq Ǵaini Alashbaevaǵa kelgende birshama jeńildik tanytýdy suraimyn. Onyń densaýlyǵy nashar ekenin bilemin, sondyqtan úiqamaqta ustaý jetkilikti dep oilaimyn», – dedi ol.
Eske sala ketsek, buǵan deiin prokýratýra Perizat Kairatqa 10 jyl bas bostandyǵynan aiyrý, múlkin tárkilep, 10 jyl boiy qaiyrymdylyqpen ainalysýǵa tyiym salýdy suraǵan bolatyn. Anasy Ǵaini Alashbaevaǵa 8 jylǵa bas bostandyǵynan aiyrý jazasy suraldy. Aiyptalýshylar óz kinálaryn moiyndaǵan joq. Sot protsesi jalǵasyp jatyr.
