"AvtoVAZ" kompaniiasy qaýipsizdik júiesindegi aqaýǵa bailanysty shamamen 23 myń Niva jol talǵamaityn kólikti keri qaitaryp jatyr. Bul týraly Reseidiń Tehnikalyq retteý jáne metrologiia federaldyq agenttigi (Rosstandart) málimdedi, dep habarlaidy Dalanews.kz.
Keri qaitarý sharasy 2021 jyldyń qazanynan 2023 jyldyń qarashasyna deiin satylǵan 14 024 Lada Niva Travel kólikterine qatysty. Rosstandarttyń málimetinshe, buǵan sebep — jedel qyzmetterdi shaqyrý júiesiniń (SVEOS) "ERA-GLONASS" basqarý blogynyń ornatylmaýy.
Sonymen qatar "AvtoVAZ" 2021 jyldyń 31 qazanynan 2024 jyldyń 2 mamyry aralyǵynda satylǵan 8 912 Lada Niva Legend kóligin de keri qaitaryp jatyr. Bul kólikterde jedel qyzmetterdi shaqyrý júiesiniń (SVEOS) basqarý blogy jáne qaýipsizdik jastyqshalaryn basqaratyn blok joq bolyp shyqqan.
Habarlamada atap ótilgendei, keri qaitarýǵa jatatyn kólik ielerimen "AvtoVAZ" ókilderi elektrondy poshta nemese telefon arqyly habarlasady. Jóndeý jumystaryn júrgizý úshin kólikti eń jaqyn dilerlik ortalyqqa jetkizý qajet bolady.
Sonymen birge ieler kóliginiń keri qaitarýǵa jatatynyn ózderi de teksere alady. Ol úshin Rosstandarttyń resmi saityndaǵy izdeý júiesin paidalaný jetkilikti. Barlyq jóndeý jumystary kólik ieleri úshin tegin júrgiziledi.
