Olardyń birinde aýyl turǵyndaryna arnalǵan sý tarifin tómendetý kózdelip otyr. Oǵan sýbsidiia alý jónindegi rásimderdi ońtailandyrý esebinen de qol jetkizilýge tiis. Al osy tarifterdiń ózi endi naqty óńirdiń áleýmettik-ekonomikalyq damýyn eskere otyryp aiqyndalýy tiis.
Mundai jańalyqtar «Qazaqstan Respýblikasynyń Sý kodeksine jergilikti ókildi, ortalyq jáne jergilikti atqarýshy organdar arasynda aýyzsýmen jabdyqtaýdy sýbsidiialaý jónindegi ókilettikterdiń arajigin ajyratý máseleleri boiynsha ózgerister men tolyqtyrýlar engizý týraly» zańda qarastyrylǵan. Qujat búgin eki oqylymda qabyldandy.
Endi aýyl turǵyndary aýyz sýǵa az aqsha tóleidi Senatorlar elimizdiń Sý kodeksine sondai ózgerister engizdi.
Qazir qalalarǵa qaraǵanda aýyldarda aýyz sý tarifteri joǵary bolyp tur. Munyń bir sebebi – aýyldardyń geografiialyq shalǵailyǵy men halyq sanynyń azdyǵyn jáne taǵy basqany eskergende sý qubyry infraqurylymy qurylysynyń qymbatqa túsedi. Qazirgi kezde óńirlerdegi sýdyń qunyn tómendetý úshin bul shyǵyndardyń bir bóligin memleket óz moinyna alýda.
– Aýyldyq eldi mekenderdi sapaly aýyzsýmen qamtamasyz etý – elimizdiń aldynda turǵan basty mindetterdiń biri. Depýtattar bastamashylyq jasaǵan osy zań aýyldyq jerlerdi sýmen jabdyqtaý máselelerin sheshý jolyndaǵy mańyzdy qadam ekeni sózsiz. Usynylyp otyrǵan normalar óńirlerdi damytýǵa jáne jergilikti atqarýshy organdardyń jumysynyń tiimdiligin arttyrýǵa yqpal etetini aiqyn, – dep atap ótti Máýlen Áshimbaev.
Sonymen qatar jańa tarifterdi bekitýdiń jańa tetikteri maquldandy, endi jergilikti ókildi organdar – máslihattarǵa osyndai ókilettik beriledi. Sondai-aq, jańa tarifterdi qabyldai otyryp, olar aimaqtyń áleýmettik-ekonomikalyq damýyn da eskerýi kerek. Eń bastysy, aýyl turǵyndaryna arnalǵan tarif respýblika boiynsha eń tómengi tariften tómen bolmaýy tiis, biraq ortasha oblystyq deńgeiden joǵary bolmaýy kerek.
Respýblika boiynsha beriletin aýyz sýdyń bir tekshe metri úshin eń tómengi tólem mólsheri 15 teńgeni quraitynyn eske salamyz.
Sonymen qatar, depýtattar jyljymaityn múlikke quqyqtardy ýaqtyly tirkemegeni úshin ákimshilik jaýapkershilikti alyp tastaýdy usyndy. Endi budan bylai mundai keshigý orynalǵanda adamdar jazaǵa tartylmaidy jáne aiyppul salynbaityn boldy.
Sonymen qatar, jer ýchaskesine qujattardy resimdeý jáne jyljymaityn múlikke quqyqtardy memlekettik tirkeý rásimi aitarlyqtai jeńildetiledi. Osylaisha, adamdarǵa osy memlekettik qyzmetterdi alý ońaiyraq bolady. Bul jańashyldyqtar depýtattar qabyldaǵan «Qazaqstan Respýblikasynyń keibir zańnamalyq aktilerine jyljymaityn múlikke quqyqtardy jáne zańdy tulǵalardy memlekettik tirkeý máseleleri boiynsha ózgerister men tolyqtyrýlar engizý týraly» zańda jazylǵan.
