Bolashaq oiyndary týraly sóz bolǵanda kópshilik eń aldymen Dota 2, PUBG nemese Mobile Legends oiyndaryn eske alady. Alaida týrnirdiń basty ereksheligi tek kibersportpen shektelmeidi. Dál osy jarysta jeńiske jetý jolyndaǵy kúrestiń ajyramas bóligine tsifrlyq kezeń de, naqty sport alańyndaǵy oiyn da ainalǵan erekshe formattaǵy jarystardy kórýge bolady.
Bul format fidjital dep atalady. Ataýy physical (fizikalyq) jáne digital (tsifrlyq) sózderiniń birigýinen shyqqan. Onyń negizgi qaǵidaty qarapaiym: sportshylar aldymen sport túriniń virtýaldy nusqasynda synǵa túsedi, sodan keiin tartysty naqty sport alańynda jalǵastyrady. Qorytyndy nátije eki kezeńniń jiyntyq kórsetkishi boiynsha anyqtalady. Sondyqtan jeńiske tek oiyn kontrollerin de, sport alańyn da birdei deńgeide meńgergen qatysýshy ǵana jete alady.
Dál osy ideia 2026 jylǵy 29 shilde men 9 tamyz aralyǵynda Astanada ótetin «Bolashaq oiyndary 2026» (GOTF 2026) Powered by Samruk-Kazyna halyqaralyq týrniriniń negizine ainalǵan. Jarysqa 50-den astam ulttyń 800-den astam sportshysy qatysady.
Týrnirdiń eń áserli distsiplinalarynyń biri – Phygital Football. Aldymen komandalar fýtbol simýliatorynda baq synasady, keiin mini-fýtbol alańyna shyǵyp, kezdesýdi shynaiy formatta jalǵastyrady. Jeńimpaz eki kezeńniń jiyntyq nátijesi boiynsha anyqtalady.
Biyl Astanaǵa túrli qurlyqtar men fýtbol mektepteriniń ókilderi keledi. Qatysýshylar qatarynda Ońtústik Amerikanyń eń ataqty klýbtarynyń biri sanalatyn ýrýgvailyq Peñarol, Kings League jankúierlerine jaqsy tanys ispaniialyq LOS TRONCOS FC, sondai-aq Afrikadaǵy eń tanymal sport brendteriniń biri sanalatyn ORLANDO PIRATES FIVES bar.
Olarmen birge FFK Rotor, Club Holcattes, FC OLYMPIC PHYGITAL, Oeste SP, UEL Team jáne halyqaralyq irikteýden ótken ózge de komandalar óner kórsetedi.
Osyndai quramnyń arqasynda fidjital-fýtbol týrniri shyn máninde halyqaralyq deńgeidegi jarysqa ainalady. Bir alańda Eýropa, Latyn Amerikasy, Afrika jáne Aziia ókilderi kezdesedi.
Dál osyndai qaǵidat Phygital Basketball distsiplinasynda da qoldanylady. Aldymen qatysýshylar tsifrlyq match ótkizedi, keiin naqty basketbol alańyna shyǵyp, 2×2 formatynda oiyndy jalǵastyrady.
Bul jarysta tek virtýaldy nemese tek fizikalyq kezeńde myqty bolý jetkiliksiz. Jeńiske jetý úshin eki kezeńde de joǵary nátije kórsetý qajet. Chempiondyq úshin Ispaniianyń áigili Valencia Basket, Argentinanyń ataqty Boca Juniors, qazaqstandyq PBC Astana, sondai-aq Dangerous, Team Apex, Paris Phygital, MINSK, Club Pepesqueros jáne álemniń ózge elderinen kelgen komandalar baq synaidy.
Qazaqstandyq jankúierler úshin PBC Astana komandasynyń qatysýy jarystyń tartymdylyǵyn arttyra túsedi. Jergilikti komanda halyqaralyq deńgeidegi myqty qarsylastarmen kúsh synasyp, óz múmkindigin dáleldeýge múmkindik alady.
Fidjital distsiplinalary erekshe formatynyń arqasynda álem boiynsha qarqyndy tanymaldyqqa ie bolyp keledi. Olar dástúrli sport pen kibersport jankúierlerin bir alańǵa toǵystyryp, múlde jańa aýditoriia qalyptastyrýda. Bul jerde jyldam reaktsiia, taktikalyq oilaý, joǵary fizikalyq daiyndyq, komandalyq ózara áreket jáne eki túrli oiyn formaty arasynda jyldam beiimdelý qabileti birdei mańyzdy.
Sondyqtan kóptegen qatysýshylar fidjitaldy dástúrli sportqa balama emes, onyń jańa damý kezeńi dep baǵalaidy. Munda tsifrlyq tehnologiialar sport sheberligin almastyrmaidy, kerisinshe ony jańa deńgeige kóteretin mańyzdy quramdas bólikke ainalady. «Bolashaq oiyndary 2026» (GOTF 2026) Powered by Samruk-Kazyna aiasynda álemniń eń úzdik komandalary segiz distsiplina boiynsha baq synaidy. Olardyń qatarynda Dota 2, PUBG, sondai-aq fidjital-fýtbol men fidjital-basketbol bar.
Qazaqstan úshin bul tek aýqymdy halyqaralyq týrnirdi qabyldaý ǵana emes. Bul – elimizdiń álemde qarqyndy damyp kele jatqan jańa sporttyq qozǵalystyń mańyzdy ortalyqtarynyń birine ainalyp kele jatqanyn kórsetetin múmkindik.
