Atyraýda ógei qyzdaryn zorlaǵany úshin sottalǵan Dabyl Járdemulynyń túrmede óli kúiinde tabylǵany qoǵamda rezonans týdyrdy. Keiin onyń Atyraý qalasynyń ákimi Shakir Keikinniń alys týysy ekeni belgili boldy. Bul týraly quqyq qorǵaý organdaryndaǵy derekkózder jýrnalisterge habarlaǵan, dep habarlaidy Dalanews.kz Newtimes basylymyna silteme jasap.
Derekkózderdiń málimetinshe, Dabyl Járdemuly ákimniń týysy bolǵanymen, týǵan aǵasy emes. Osyǵan bailanysty olardyń tegi men ákesiniń aty ártúrli.
Sottalýshy Jylyoi aýdanynyń Qulsary qalasynda jerlengen. Bul óńir - Atyraý ákimi Shákir Keikinniń de týǵan jeri.
Kýágerlerdiń aitýynsha, jerleý rásimine júzdegen, kei derekter boiynsha myńǵa jýyq adam jinalǵan. Olardyń arasynda memlekettik qyzmetkerler de bolǵan. Alaida marqumnyń týystary qylmystyq istiń mán-jaiyn jariia etpegendikten, jerleýge kelgenderdiń barlyǵy onyń qandai qylmys úshin sottalǵanyn bilmegen.
51 jastaǵy Dabyl Járdemuly asa aýyr qylmystar úshin sottalǵan. Sot ony QR Qylmystyq kodeksiniń 121-babynyń 4-bóligi («Kámeletke tolmaǵandy zorlaý») jáne 124-babynyń 4-bóligi («Kámeletke tolmaǵandardy azǵyndatý») boiynsha kináli dep tanyǵan. Is boiynsha jábirlenýshi retinde onyń ógei qyzdary - eki kámeletke tolmaǵan qyz ótken. Er adam 25 jylǵa bas bostandyǵynan aiyrylǵan, alaida úkim sol sátte zańdy kúshine enbegen. Osyǵan bailanysty ol túrmege etaptalmai, tergeý izoliatorynda qamaýda bolǵan.
22 naýryz kúni pedofiliia úshin sottalǵan Dabyl Járdemuly túrmede qaza tapty. Resmi málimet boiynsha, ol tergeý izoliatoryndaǵy jappai tóbeles kezinde óltirilgen.
