Atyraýda qalada keńinen tanymal bloger jáne kásipker áielge qatysty qylmystyq is boiynsha sot úkimi shyqty. Ol alaiaqtyq jasady dep tanylyp, 6 jyl 6 aiǵa bas bostandyǵynan aiyryldy, dep habarlaidy Dalanews.kz.
Sot qujattarynda kórsetilgendei, 2024 jyldyń 4 naýryzynan 12 sáýirine deiin bloger men onyń qurbysy bir tanysyn investitsiiaǵa aqsha quiýǵa úgittep, aldap, iri kólemde qarajat aýdartqan. Olar investitsiialardyń joǵary paida ákeletinin aityp sendirip, jábirlenýshini ártúrli kúnderi túrli somalarda aqsha aýdarýǵa kóndirgen. Áielder uzaq ýaqyt boiy jábirlenýshimen bailanysta bolyp, investitsiialardyń tabysty júrip jatqanyna sendirý arqyly aqparattyq illiýziia jasaǵan.
Er adam jyldam baiyp ketýdi kózdep, 33 million teńgeden astam qarjy aýdarǵan. Onyń bir bóligin túrli bankterden nesie retinde alǵan, sondai-aq ózine tiesili altyn buiymdary men qymbat kólikterin lombardqa ótkizip, qarajat tapqan. Alaida ýáde etilgen tabysqa qol jetkize almaǵan.
Bul áreketpen toqtamaǵan áielder gúl satýmen ainalysatyn birneshe kásipkerdi de aldap, olardan tegin gúl alýǵa kóndirgen. Sot málimetine súiensek, gúlderdi alǵannan keiin, aiyptalýshylardyń biri Instagram paraqshasynda olardy jariialap, "Mister H-ten kelgen syilyq" dep jazǵan. Bul áreketter nátijesinde bir kásipker 634 myń teńge, al ekinshisi 3,3 million teńge shyǵynǵa batqan.
«Aiyptalýshylardyń alaiaqtyq jasaǵany is materialdary, jábirlenýshiler men kýágerlerdiń aiǵaqtary, geolokatsiia derekteri, banktik aýdarymdar týraly málimetter, tergeý amaldarynyń hattamalary men zattai aiǵaqtar arqyly dáleldendi», – delingen sot úkiminde.
Sot barysynda bloger de, onyń qurbysy da aiyptaryn moiyndap, ókinish bildirgen. Nátijesinde sot ekeýin de kináli dep tanyp:
blogerge 6 jyl 6 ai merzim,
onyń qurbysyna 5 jyl 6 ai bas bostandyǵynan aiyrý jazasyn taǵaiyndady.
Sot úkimi zańdy kúshine engen joq jáne apelliatsiialyq tártippen shaǵymdanýǵa bolady.
