Atyraýda aýa sapasy on esege deıin nasharlaǵan, - dep habarlaıdy Dalanews.kz "Aq Jaıyqqa" siltep.
Ekologıa departamentiniń málimetinshe, 17-18 naýryz kúnderi №17 lastaýshy baqylaý beketi men №114 "Zagorodnaıa" atmosferalyq aýa sapasyn baqylaý stansıalarynda kúkirtsýtektiń mólsheri ruqsat etilgen shekten 1-4 esege deıin asyp túsken. Sol kúnderi jel ońtústik-batys jáne batys baǵyttarda soǵyp, jyldamdyǵy 2-7 m/s aralyǵynda boldy.
"18-19 naýryz kúnderi "AMÓZ JSHS-ne tıesili "Mırnyı" stansıasynda kúkirtsýtek mólsheri 4 ese, "Peretaska" stansıasynda 1 ese, №103 "Shaǵalada" 5 ese, 109 "Vostok" stansıasynda 8 ese, №111 "Jılgorodok" stansıasynda 4 ese, №112 "ákimdikte" 10 ese, №113 "Avangard", №114 "Zagorodnaıa" jáne №5 "Qursaı" stansıalarynda 1-5 esege deıin artqany anyqtalǵan", - dep jazylǵan habarlamada.
18-19 naýryz kúnderi qaladaǵy qolaısyz ekologıalyq jaǵdaıǵa baılanysty Atyraý oblysynyń ekologıa departamenti, sanıtarıalyq-epıdemıologıalyq baqylaý departamenti jáne "Qazgıdromet" RMK birlesip, aýa sapasyna monıtorıń júrgizgen.
Synamalar "Kvadrat" býlaný alańynda, Atyraý qalasynyń 5 shaqyrym aýmaǵynda, "QazTransOıl" AQ-nyń ońtústik betkeıindegi sanıtarıalyq qorǵaý aımaǵynan tys jerde, sondaı-aq, "Atyraý munaı óńdeý zaýytynyń" sanıtarlyq qorǵaý aımaǵynan tys jerlerde alynǵan.
"Zertteý barysynda aýadaǵy kúkirtsýtek (H₂S), kómirsýtek (C₆-C₁₀) jáne benzol (C₆H₆) mólsheri tekserildi. Nátıjesinde "Kvadrat" býlaný alańynda ruqsat etilgen shekten asý deregi tirkeldi", - dep jazylǵan habarlamada.
"19 naýryzda saǵat 05:00-05:20 aralyǵynda №111 "Jılgorodok" stansıasynda kúkirtsýtek mólsheri 11 esege, al №112 "ákimdik" stansıasynda 10,7 esege artqany anyqtaldy", - dedi departamenttiń baspasóz qyzmeti ókili.
Ekologıa departamenti qaladaǵy iri kásiporyndardyń ekologıalyq zańnama talaptaryn saqtaýyna qatysty jospardan tys tekseris taǵaıyndady.
