Atyraý garnizonyndaǵy áskeri bólimderdiń birinde ótken josparly atys jattyǵýlary kezinde merzimdi áskeri qyzmetshi oq jaraqatyn alyp, kóz jumdy, dep habarlaidy Dala News.
Atyraý garnizonynyń baspasóz qyzmetiniń málimetinshe, oqiǵa 12 naýryz kúni dalalyq atys jattyǵýlary barysynda bolǵan. Aldyn ala derekter boiynsha, qaiǵyly jaǵdai qarýdy paidalaný kezinde jiberilgen abaisyzdyqtyń saldarynan oryn alǵan.
Jaraqat alǵan áskeri qyzmetshi birden meditsinalyq mekemege jetkizilgen. Alaida dárigerlerdiń barlyq kúsh-jigerine qaramastan, onyń ómirin saqtap qalý múmkin bolmaǵan.
Qazaqstan Qarýly Kúshteriniń qolbasshylyǵy qaza tapqan sarbazdyń týystary men jaqyndaryna kóńil aityp, otbasyna zańnamaǵa sáikes barlyq qajetti kómek kórsetiletinin málimdedi.
Atalǵan derek boiynsha Ishki ister ministrliginiń Áskeri-tergeý basqarmasy qylmystyq is qozǵady. Qazirgi ýaqytta oqiǵanyń barlyq mán-jaiyn anyqtaý úshin sotqa deiingi tergeý júrgizilýde.
Qorǵanys ministriniń tapsyrmasymen oqiǵa ornyn tekserý úshin Qorǵanys ministriniń orynbasary basqaratyn arnaiy komissiia jiberilgen. Tergeý barysy Bas áskeri prokýratýranyń baqylaýyna alynǵan.
