Atyraý oblysynyń Jangeldin aýylynan joǵalǵan otbasynyń isi boiynsha izdestirý jáne tergeý jumystary áli toqtaǵan joq. Qazirgi tańda negizgi izdestirý sharalary kúdikti buryn turǵan Geolog yqshamaýdanynda júrgizilip jatyr, dep Dalanews.kz tilshisi "Aq Jaiyq" basylymyna silteme jasap habarlaidy.
Naýryz ben Miramgúldi izdeý jumystary bes kúnnen astam ýaqytqa sozylǵan. Atalǵan aýmaqta politsiia men Ulttyq ulannyń shekteýli kúshi jumyldyrylyp, arnaiy jyljymaly shtab qurylǵan. Quqyq qorǵaý organdarynyń málimetinshe, buǵan deiin aýqymdy izdestirý sharalary atqarylǵanymen, tergeý barlyq baǵytta jalǵasyp jatyr.
Politsiia qyzmetkerleriniń biri aty-jónin atamaýdy surap, isti tergeý barysynda barlyq yqtimal nusqalar qarastyrylyp jatqanyn aitty. Sonyń ishinde kúdiktiniń buryn turǵan jerine qatysty boljam da basty nazarda.
Bul aýmaqtyń tekserilýi de beker emes. "Aq Jaiyq" basylymynyń dereginshe, kúdikti Sultan Sársemaliev pen jubaiy Aqbaian osy yqshamaýdanda aiyna 50 myń teńgege ýaqytsha baspana jaldap turǵan. Erli-zaiypty sol úide biraz ýaqyt ómir súrgen. Aýdandaǵy úilerdiń bir bóligi bos tursa, endi biri jalǵa berilgen.
Úidiń ishinen tergeý júrgizilgeni aiqyn baiqalady: bólmeler muqiiat tekserilgen, keibir zattar oryndarynan qozǵalǵan. Bólmeniń ortasynda kilem jinaýly jatyr, al tereze jaqtaýlarynda plombany alǵannan keiin qalǵan qyzyl boiaýdyń izi saqtalǵan.
Aýla men onyń mańaiynda buryn júrgizilgen izdestirý jumystarynyń belgileri bar. Kei jerler qazylyp, arnaiy tehnikanyń izderi baiqalady. Buǵan deiin jer astyndaǵy nysandardy anyqtaýǵa arnalǵan georadar qoldanylǵan. Bul qural Oral qalasynan jetkizilip, aýla, mańaidaǵy jer telimderi men úi ainalasy tolyq tekserilgen.
Aýdannyń qurylysy birkelki emes, saiajai aýmaqtarymen shektesedi. Munda beinebaqylaý kameralary óte az, al kórshilerdiń kameralary beinejazbalardy nebári 15 kúnge deiin ǵana saqtaidy. Bul oqiǵanyń naqty hronologiiasyn qalpyna keltirýdi qiyndatyp otyr.
Kórshiles úilerde Ózbekstan azamattary turady. Olardyń aitýynsha, eshqandai kúmándi jaǵdai baiqalmaǵan. Tergeý barysynda yqshamaýdannyń ózge turǵyndary da suralǵan, barlyǵy derlik janjal, shý nemese oǵash áreketterdi kórmegenin aitqan.
Kórshiler joǵalǵan otbasyn tuiyq, kópshilikpen aralasa bermeitin adamdar retinde sipattaidy. Olar syrtqa sirek shyǵyp, ainalasyndaǵylarmen bailanys ornatpaǵan.
Izdeý barysynda aýla men mańai tolyq tekserilip, qazý jumystary júrgizilgen, shóp pen qamys shabylǵan. Alaida ázirge naqty nátije joq. Jumystyń kúrdelene túsýine aýmaqtyń dalaǵa jaqyn ornalasýy, temirjoldyń bolýy, laily jer men aýa raiynyń qolaisyzdyǵy áser etip otyr.
Resmi málimetke sáikes, tergeý barlyq yqtimal nusqalardy qarastyrýda. Degenmen júrgizilip jatqan sharalar joǵalǵan adamdardyń qaza bolýy múmkin degen boljamǵa kóbirek mán berilip otyrǵanyn ańǵartady.
Izdeý jáne tergeý jumystary jalǵasýda.
