Atyraý munai óńdeý zaýytyndaǵy janjal kóptiń nazaryn aýdartty. Dálirek aitsaq, basshylyq quram óz ishinen qyryq pyshaq boldy. Endi zaýyttyń basshylyǵyna qatysty tergeý júrgiziletin boldy, - dep habarlaidy Dalanews.kz.
Qarjy monitoring agenttiginiń Atyraý oblysy boiynsha departamenti óńirlik prokýratýramen birlesip jumystardy bastady.
"Atyraý munai óńdeý zaýyty" JShS basshylyǵyna qatysty memleketke asa iri kólemde zalal keltirý túrindegi aýyr zardaptarǵa ákep soqqan laýazymdyq ókilettikterdi teris paidalaný deregi boiynsha sotaldy tergeý júrgiziledi", - dep jazylǵan Qarjy monitoring agenttigi málimetinde.
Vedomstvo ókilderi bul jaitqa qatysty ózge aqparat jariialanbaitynyn málimdedi.
Alaida Atyraý munai óńdeý zaýytyndaǵy daý búgin bastalyp otyrǵan joq. Buǵan deiin de buqaralyq aqparat quraldary men áleýmettik jelide bul másele qyzý talqyǵa tústi.
Zaýyttyń atqarýshy direktory Ǵalymjan Jýsanbaev Prezident Qasym-Jomart Toqaevqa úndeý joldap, "QazMunaiGaz" ulttyq kompaniiasynyń basshylyǵy oǵan zaýyttaǵy jaǵdai týraly buqaralyq aqparat quraldarynda sóileýge tyiym salǵanyn málimdegen bolatyn.
Keiin daýly jait jumystan bosatýmen jalǵasty. Atyraý munai óńdeý zaýytynyń bas direktory men bas injeneri qyzmetinen bosatyldy. "QazMunaiGaz" komissiiasynyń jumysynan keiin osyndai sheshim qabyldandy.
"Atyraý munai óńdeý zaýytynyń bas direktory Ǵalymjan Jýsanbaev pen bas direktordyń orynbasary – bas injener Ádilet Shoshanbasovty qyzmetterinen bosatý týraly sheshim qabyldandy. Bas direktordyń mindetin atqarý ári qarai sheshim qabyldanǵanǵa deiin Atyraý munai óńdeý zaýyty bas direktorynyń orynbasary – tehnikalyq direktor Oleg Aleksandrovich Lyzlovqa júkteledi", - dep málimdegen edi kompaniianyń baspasóz qyzmeti ókilderi.
Aita keteiik, Ǵalymjan Jýsanbaev bir aidan asa ýaqyt boiy Atyraý munai óńdeý zaýytynda basshy bolǵan. Ol bul qyzmetke kelip, jumysty aýditten bastaǵan. Al 15 aqpanda tsirkýliatsiialyq kompressor toqtaǵanyn anyqtaǵan, óitkeni ol jyldar boiy josparly jóndeýsiz jumys istep túrǵan. Bul jóndeýge kelisim-shart affiliirlengen kompaniialar tobynyń jetkizýshisimen arada jasalǵan.
Degenmen zaýyttyń eks-basshysy 18 aqpannan beri úiinde em alyp júrgen. Qyzmetinen ketkeni týraly áleýmettik jeliden bilgen. Jýsanbaevtyń ózi jumystan ketýin zańsyz dep sanaidy.
