Shymkent qalasynyń eks-ákimi Murat Áitenovtiń aǵasy Marat Áitenov áleýmettik jelide jazba jariialady. Ol Astanadaǵy Parasat, 16 mekenjaiyndaǵy úidi kezinde burynǵy jubaiy Dana Áteshovaǵa bermek bolǵanyn, alaida onyń ózi bul kelisimge kelmegenin málimdedi, - dep habarlaidy Dalanews.kz.
Onyń sózinshe, qoǵamda bul máselege qatysty daý basylmai tur.
"Dana Áteshovanyń suranysyn qanaǵattandyryp, oǵan Parasat 16 mekenjaiyndaǵy úidi rásimdeýge bailanysty meniń buryn jariialaǵan keibir qujattarym men bergen túsiniktemelerime qaramastan, qoǵamda osy suraq áli de talqylanyp jatyr. Shamasy, Dananyń jasaǵan málimdemeleri áli de qoǵamdyq sanaǵa áser etse kerek. Men bul jaǵdaidy taǵy bir ret túsindirýge tyrysaiyn. Dosym Áteshovpen áńgimemniń videoskrinshotyn salaiyn. Bul - Dana Áteshovanyń týǵan aǵasy", - dep jazdy Marat Áitenov.
Marat Áitenov bul hattardy Dos Áteshovpen 2021 jylǵy 30 jáne 31 tamyzda jazysqanyn aitty.
"Áńgime men hat almasýdan meniń Dananyń, balalardyń nemese Dostyń atyna Parasat, 16 úiin rásimdeýge daiyn ekenimdi kórýge bolady. Biraq Áteshovtardyń Parasat, 16 úiiniń iesi bolý tilegin oryndaý úshin meniń daiyn bolǵanym men erik-jigerim jetkiliksiz. Ol úshin Áteshovtar kelip, barlyq tiisti qujattarǵa qol qoiýy kerek. Biraq olar muny istemedi, tek ózderine túsinikti sebeptermen, aqylǵa qonymsyz áreketterge kóshti. Sondyqtan Dana men onyń aǵasynan aiǵai-shýdy, Parasat 16 mekenjaiyndaǵy úi bizge berilmedi dei berýdi toqtatýdy suraimyn", - deidi ol.
Aita keteiik, Shymkent qalasynyń eks-ákimi Murat Áitenovtiń aǵasy Marat Áitenovtiń ústinen buǵan deiin qylmystyq is qozǵalǵan edi. 15 shildede Áitenov 5 táýlikke qamaldy.
Jýyrda áleýmettik jelide Dana Áteshova men balalary úiden kúshpen shyǵarylyp jatqan video tarady. Keiin bul is qoǵamda úlken rezonansqa ulasty.
