Aimaq basshysy Keńes dáýirinen qalǵan indýstriialyq alpaýyttyń aýmaǵyndaǵy nysandar men infraqurylymdardyń jaqsy saqtalǵanyna toqtaldy. Desek te, zaýyttyń ózin qaita iske qosý qiyn sharýa. Sondyqtan da, oblys basshylyǵy zaýyttyń aýmaǵynda birqatar jańa kásiporyndar qurý maqsatynda óndiris nysandaryn kásipkerlerge eki aiǵa tegin berý isin qolǵa alyp, jeńildetilgen baǵa saiasatyn usynbaq.
Ońtústik Qazaqstan oblystyq kásipkerler palatasynyń direktory Asqar Ábýbákirovtiń málimdeýinshe, «Atameken-Ordabasy» indýstrialdy parki kásipkerlerge zańgerlik jáne býhgalterlik qyzmet kórsetip, olardy biznes salasynda oqytýdy da qolǵa almaq. Sondai-aq, atalmysh mekeme kásip ashqysy keletinderge aqparattyq jáne PR qoldaý kórsetip, jarnamalaý, qarjy kózin tartýǵa at salysý, biznes-jospar jasaý syndy tegin qyzmetter jiyntyǵyn qosa usynyp otyr.
Qala syrtynda ornalasqan óndiris ornynda aýyl sharýashylyǵy men tamaq óndirisinen ózge barlyq salalar úshin qolaily jaǵdai jasalǵan. Onda taýarlarǵa arnalǵan qoima da bar. Búginde parkte 5 joba iske asyrylyp jatyr. Oblys ákimi Janseiit Túimebaev tegin qyzmetter jiyntyǵyn túsindirý jumystaryn kúsheitýdi tapsyrdy.
«Qorǵasyn zaýytynyń bolashaǵy túsiniksiz. Sondyqtan aldaǵy ýaqytta eki zaýytty da tiimdi paidalanýdyń tetikterin oilastyrǵan jón. Eger múmkin bolyp jatsa, ondaǵy jer telimderi men óndiris oshaqtarynda jańa óndiris oryndaryn ashýdy qolǵa alýymyz kerek», - dedi Janseiit Qanseiituly.
Aita keteiik, 2010 jyldary «Ońtústikpolimetall ÓK» aktsionerlik qoǵamy men «Qazaqmys» korporatsiiasy jáne «A-Mega treiding» JShS-niń úshjaqty kelisimi negizinde qorǵasyn zaýyty tolyqqandy jumysqa kóshken bolatyn. Alaida, ónerkásip ornynyń jumysy qaita turalap, bankrotqa ushyrady. Búginde zaýyttyń birqatar ǵimarattary bankte kepildikte tur.
OQO ákiminiń baspasóz qyzmeti
