Ata-ana janaiqaiy: «Sáken men Meirambek qazaq estradasynyń kósemderi bolǵysy kele me?»
«Bir suqbatynda Sáken Maiǵaziev ádettegisinshe Ninety One toby týraly oi tolǵap, «Adam tanityndai, meiirlene qushaqtaityndai, súietindei, ata-analary qalai jaqsy kóretinin men bilmeimin. Qalai olarǵa úiretpeitinin, meniń júregim aýyrady. Ózim úshin emes, urpaqtarym úshin», – depti. Atap aitsaq, Sáken budan buryn da top músheleriniń bolmysyna syn aityp, birese jaqtap, birese dattap júrgen-di. 2 jyl úndemei kele jatqan bizge, bul sózder shekten shyqqandyq bolyp kórindi. Qanattyǵa qaqtyrmai, tumsyqtyǵa shoqyttyrmai, bar bilgenimizdi úiretip, ósirip jatqan balalarymyzǵa til tigizip qana qoimai, olardyń ata-analarynyń, iaǵni bizdiń bergen tárbiemizdi joqqa shyǵarmaq bolǵan sózderi bizdiń qolymyzǵa qalam alyp, osy ashyq hatty joldaýǵa májbúrlep otyr», – dep bastaidy sózin Daniiar Qulymshinniń (Bala) ata-anasy.
Budan keiin, ashynǵan ata-ana 91 toby týraly anekdot shyǵarǵan Sákenniń bul áreketin zańsyzdyqqa balady.
«Óner joly – aýyr jol, erikkenniń ermegi emes, tanymaldylyq ta ońailyqpen kelmeidi. Ol úshin talant, eńbek, erik-jiger qajet. Osynyń bárin bile tura, bir ónerpaz ekinshilerine neshe túrli ataý berip, qala berdi anekdot shyǵaryp, onysyn jariia basylymdarda jariialaýy – birinshiden, jeke adamdardyń ar-namysyna til tigizýi, iaǵni zań buzýshylyq bolyp eseptelinedi. Ekinshiden, atalmysh toptyń tyńdarmandarymen sanaspaǵandyq, olardyń talǵamdaryn syilamaǵandyq dep bilemiz!
Naqtylap aitsaq, 91 toby týraly jaǵymsyz, birjaqty pikirler aityp júrgen óner adamdarynyń ishinen, jastailarynan kóz aldymyzda ósken, ózderi de top qurǵan, onyń barlyq «qyzyq-shyjyǵyn» biletin Saken Maiǵaziev, Meirambek Besbaev inilerimizdiń qandai bastamaǵa janashyrlyq jasamaq bolyp júrgenderin túsine almadyq. Álde qazaq estradasynyń kósemderi bolǵysy kele me nemese estradaǵa Keńes Odaǵynda oryn alǵan saiasi tsenzýra ornatýǵa bastamashy bolǵysy kelip júr me?! Túpki maqsattary ne? Topty taratý ma?» – dep jalǵaidy sózin Áliia Qadyrova men Aqylbai Qulymshin.
Budan keiin, hat avtorlary Meirambek Besbaevtyń Ninety one týraly pikirine toqtalady.
«Jaraidy, qarapaiym tyńdarman ónerdiń kei tustaryn túsinbei nemese toptyń mýzykasyn, kiim kiisterin jatsynyp, túrli sózder aityp jatsa, túsinýge bolady. Talǵamǵa talas joq degen. Alaida mádeniet qairatkerleriniń kásibi syn emes, bireýiniń anekdot shyǵaryp, ekinshisiniń /Meirambek Bespaevtyń Zhuldyz.tv-ǵa bergen beine suhbatynda/ «…Ondai tanymaldylyqtyń keregi joq. 5 adam bolsa, 2-i urǵysy kep júredi. Buǵynyp-tyǵylyp júrgen ol óner me, ákeń?» degenin qalai túsinýge bolady? Meirambek pen Sáken osylai degen dep, topqa qarsy bolyp júrgenderdiń qarsylyǵyn odan saiyn órshitý me maqsattary?
Tipti, 91 (Ninety one) tobyndaǵy balalarymyzdyń «tárbiesi» jaily sóz qozǵap, jón kórsetýge, qala berdi, bizdi, ata-analaryn sóz qylýǵa eshkimniń haqysy joq. Balalarymyz ónerlerine súienip, ánderin jazyp, bilerin bilep, halyqtyń aldynda qalai erkelese de, qalai júrse de óz erikteri. Kezinde sizderdiń ánderińizdi tyńdap, ónerlerińizge súisinip, qurmettedik, maqtan ettik. Endi sizderdiń bizdiń balalarymyzdyń bastamalaryna qabattasýlaryńyzǵa jol bolsyn?
91 toby jańa zamanǵa laiyqtalǵan janrda óner kórsetip, álemdik pop mýzyka yrǵaqtarynsyz jańa zaman tynysyn sezine almaityn óskeleń urpaq, jas býynnan turatyn ózindik pýblikasy bar top. Bizdiń balalarymyz, áýeli Allanyń amanatynda, odan qaldy ózimizdiń baqylaýymyzda! Dúiim qazaq jastarynyń tárbiesi osy bes jigittiń qolynda emes. Balany tárbieleý – sahnadaǵy bes jigittiń emes, úidegi ata-ananyń mindeti. Al kimde-kim balasyn tárbielei almasa – kiná ózinen. Ony sahna juldyzdarynan kórýdiń túkke qajeti joq. Mýzykant, ánshi retinde mýzykalyq janrlaryn, jasaǵan dúnielerin: singl, albom, paiym, beinebaiandary jaily syn, kem tustaryn aitsańyzdar óz erikterińiz. Al, jeke basqa tiisip, ata-analarynyń bergen tárbielerine kúmán keltirý – shekten shyqqandyq bolyp tabylady. Biz uzaq ýaqyt úndemei keldik. Sebebi, bizdi ishki mádenietimiz salǵylasyp, bet jartysyp jatýǵa jibermedi. Áli de “qazaqshyldyq” tanytyp otyrǵanymyzdy qaperlerińizge ustaǵaisyzdar!
Biz bar bilgenimizdi boiyna sińirip, alaqanymyzǵa salyp ósirgen balalarymyz jaily aitylyp jatqan ǵaibat sózderge qosylyp, tipti, bergen tárbiemizge kúmán keltirip otyrǵan, ózimiz esti dep sanap kelgen Sáken men Meirambek bolǵany qynjyltty.
Ainalaiyndar, Meirambek, Sáken! Bizdiń júrip ótken jolymyz sizderdikinen edáýir uzaq ári ǵumyrly. Biz boiyna qazaqy tárbie men rýh uialatyp ósirgen balalarymyzǵa senemiz! Bárine ýaqyt tóreshi! Atam qazaq «bolar balanyń belin bý» degen. Artyq áńgimeni qoiyńyzdar! Sózge toqtaidy dep úmittenemiz.
Ózderiń de bir sát jastyq shaqtaryńyzǵa oralyp, 19 jasta qandai án tyńdap, qandai kiim kiip, qandai bi bilegenderińdi eske túsirińizdershi», – deidi 91 tobynyń múshesi Qulymshin Daniiardyń (Bala) áke-sheshesi, mádeniettanýshy Qulymshin Aqylbai men filolog-zańger Qadyrova Áliia.
