Kórmeniń ashylýyna mádenıet maıtalmanynyń ul-qyzdary men shákirtteri, mýzeı qyzmetkerleri, mektep oqýshylary men oqytýshylar jáne qala qonaqtary qatysty.
Sharany «Áziret Sultan» qoryq-mýzeıi dırektorynyń orynbasary Serik Úrkimbaev quttyqtaý sózben ashyp berip, ekspozısáǵa qoıylǵan qundy jádigerler jáne olardyń tarıhı mańyzdylyǵy jóninde áńgimeledi.
Sondaı-aq, Adasqan Altaevtyń shákirti, Oblystyq máslıhat depýtaty Serik Ibadýllaev ustazy jaıly estilikter aıtty. Sondaı-aq, kórmeni uıymdastyrǵan qoryq-mýzeı ujymyna alǵysyn bildire otyryp 40 jyldyq mereı toıymen quttyqtady.
Mýzeıge syı aksıasy aıasynda uıymdastyrylǵan «Mýzeı janashyry – Adasqan Altaev» kórmesi negizgi úsh bólimnen quralǵan. Birinshi bólimde Adasqan Altaevtyń ómiri, júrip ótken joldary, ásker qataryndaǵy jyldary, ustazdyq qyzmeti, qazaq halqynyń rýhanı-materıaldyq bolmysyn saqtaýda atqarǵan eńbekteri, ólketaný mýzeıin qurýy, qazaqtyń ulttyq óneri, saıatshylyq pen ańshylyqtyń saqtalýyna sińirgen eńbekterine qatysty materıaldar qamtyldy. Ekinshi bólimde Adasqan Altaevtyń «Áziret Sultan» mýzeıine tartý etken jádigerleri. «Áziret Sultan» mýzeıinde qyzmet atqarǵan jyldaryna qatysty materıaldar usynylsa, úshinshi bólim B.Áltaevtyń áke jolyn jalǵastyrýda atqarǵan eńbekterine qatysty materıaldar, onyń ustanǵan azamattyq pozısıasyn kórsetetin qujattar men fotosýretterge arnalǵan.
Shara barysynda aqyndardyń Adasqan Altaevty jyrlaǵan óleńderi oqylyp, qalalyq S.Seıfýllın atyndaǵy №4 mektep-lıseıiniń 5a synyp oqýshysy Mahambetov Býrhan «Qaza men aza» óleńimen kópshilik kózine jas aldyrdy.
"QmD" aqparat
