Konferentsiiaǵa oblys ákiminiń orynbasary Ulasbek Sádibekov pen birge jaýapty basqarma basshylary qatysyp, óńirdiń áleýmettik-ekonomikalyq damýy men mádeniet kúnderine arnalǵan sharalar jaiyn baiandady. Osy jyldyń 7 aiynyń qorytyndysymen oblysta mańyzdy áleýmettik-ekonomikalyq kórsetkishterdiń ósimi saqtalǵanyn aitqan aimaq basshysynyń orynbasary oblysta jyl basynan beri 439,1 mlrd. teńgeniń ónerkásip ónimi óndirilip, ótken jyldyń sáikes kezeńimen salystyrǵanda 0,3 paiyzǵa óskenin aitty.
– Ońtústik Qazaqstan oblysynda indýstriialandyrý kartasynyń ekinshi besjyldyǵy (2015-2019 jj.) aiasynda jalpy somasy 47,1 mlrd. teńgeni quraityn 47 joba iske asyrylyp, 1 650 jańa jumys orny ashyldy. Al, osy jyly quny 1,7 mlrd. teńge bolatyn 3 joba iske qosylsa, jyl sońyna deiin 14 jobany júzege asyrý josparlanyp otyr. Sondai-aq, jyl sońyna deiin ónerkásip ónim kólemin 850 mlrd. teńgege jetkizip, 2,1% ósimin qamtamasyz etý kózdelýde. Mańyzdy jobalardy iske asyrý boiynsha atqarylǵan jumystardyń nátijesinde oblysqa 229,9 mlrd. teńge investitsiia baǵyttalyp, 31,5%-ǵa artty (2016 j. 166,4 mlrd.teńge). Onyń ishinde syrtqy investitsiialar 42,3 mlrd. teńgeni qurap, úlesi 14,1%-dan 16,9%-ǵa kóbeigen, – dedi óz baiandamasynda U.Sádibekov.
Ońtústik ólkesiniń bitimi bólek, tarihy tereń óńir ekenine toqtalǵan aimaq basshysynyń orynbasary bes kúnge sozylatyn Ońtústik kúnderi aiasynda ótetin is-sharalarǵa barsha astanalyqtar men qonaqtardy shaqyrdy.
«Ońtústik kúnderiniń alǵashqy sharasy shetel memleketteriniń Qazaqstandaǵy 30-dan astam elshileri qatysatyn biznes-forýmmen ashyldy. Al osy aralyqta ońtústikqazaqstandyq óner maitalmandary «Túrki eliniń túp tamyry – Ońtústikten mereili Astanaǵa sálem!» óner kerýeni, «Sálem Astana!, Sálem, EKSPO!», «Ońtústik ázilderi» shoý-kontsertterin usynsa, óńirimizdiń tarihi qundylyǵy men erekshe mádeni kelbetin dáripteitin kórnekti jádigerlerdiń kórmesi men tarihtan syr shertetin sýretshiler men qolónershiler buiymdarynyń kórmeleri ótkiziledi. Budan bólek, astanalyqtar «Báiterek» alańynda bir mezette 600 jas dombyrashynyń oryndaýyndaǵy kúidi tamashalai alady»,-dedi ákim orynbasary.
OQO ákiminiń baspasóz qyzmeti
