Álemdik jáne dástúrli dinder liderleriniń sezi qarsańynda Qytai Býddistik assotsiatsiiasy tóraǵasynyń orynbasary Tszin Bo Qazaqstannyń órkenietter arasyndaǵy dialog pen mádenietter toǵysyndaǵy erekshe róline toqtaldy, dep habarlaidy Dalanews.kz.
Tszin Bonyń aitýynsha, Qazaqstan búginde tek tarihi saýda joldarynyń qiylysy ǵana emes, sondai-aq «dombyra, gitara men arfa» úndesip, mádeni birliktiń simvoldyq simfoniiasyn jasaityn keńistikke ainaldy. Ol «Bir beldeý – bir jol» bastamasy men 2025 jyly ótken «Jibek jolyn oqý – Ortalyq Aziiamen tanysý» atty halyqaralyq aktsiiany erekshe atap ótip, bul jobalar Qazaqstannyń mádeni jáne rýhani almasý platformasy retindegi rólin kúsheitetinin aitty.
«Bul oqiǵalar órkenietterdiń ózara baiytylýynyń jańa betin ashyp, ózara qurmet pen ashyqtyq rýhyn kórsetti. Bul forýmnyń taqyrybymen tolyq úilesedi», – dedi ol.
Óz sózinde Tszin Bo ártúrli dinderdiń rýhani dástúrlerin salystyrdy. Ol býddizmdegi barlyq qubylystardyń ózara táýeldiligi, hristiandyqtaǵy jaqynyńdy súiý, islamdaǵy tózimdilik pen meiirimdilik, daosizmdegi tabiǵi jolǵa berik bolý qaǵidalarynyń barlyǵy dinaralyq dialogtyń berik negizin quraitynyn atap ótti.
Sonymen qatar, ol dini konfessiialar liderlerin yntymaqtastyqty tereńdetýge, jastar tárbiesi, otbasylyq jáne moraldyq qundylyqtardy nyǵaitýǵa, rýhani danalyqpen bólisýge jáne mádeni jobalardy birge júzege asyrýǵa shaqyrdy. Ásirese klimattyń ózgerýi, ashtyq pen qaqtyǵystar siiaqty jahandyq syn-qaterlerge birlesken jaýap berý qajet ekenin aitty.
«Dini qaýymdastyq tek sózben shektelmei, is júzinde áreket etýi tiis. Jaqsy oilardy naqty isterge ainaldyryp, bos áńgimelerdi toqtatyp, rýhani energiiany beibitshilikke baǵyttaýymyz kerek», – dedi ol.
Tszin Bo sózin sezd jumysyna sáttilik tilep aiaqtady jáne Qytai Býddistik assotsiatsiiasynyń álemdik dindermen birge alǵa qadam basýǵa daiyn ekenin jetkizdi:
«Yntymaqty qaiyq etip, senimdi jelken, al áreketti eskek etsek – beibit ári baqytty bolashaqqa jete alamyz».
