Astanada avtobýs apatynan eki aiaǵynan aiyrylǵan 8 jasar qyzdyń otbasyna ákimdik baspana beredi. Bul týraly Astana qalasynyń ákimi Jeńis Qasymbek málimdedi, dep habarlaidy Dalanews.kz.
"Qyzdyń jaǵdaiynan tolyq habardarmyz. Onymen jáne otbasymen birneshe márte kezdesýler ótti. Keshe balalar ombýdsmeni bardy. Al búgin túske deiin ákim orynbasary barmaq", – dedi ol Aqordada ótken brifingte.
Ákimniń aitýynsha, apattan keiin qyzǵa 20 million teńge kóleminde saqtandyrý tólemi qarastyrylǵan. Sonymen qatar ákimdik tarapynan alǵashqy 10 million teńge berilip, taǵy 10 millionyn qosymsha bólmek. Budan bólek, baspana máselesi de tolyq sheshiletini aityldy.
"Bul otbasyǵa páter beriledi. Muny resmi túrde málimdep otyrmyz", – dedi Jeńis Qasymbek.
Aita keteiik, buǵan deiin Astanadaǵy avtobýs apatynan aiaǵynan aiyrylǵan 8 jastaǵy qyzdyń jaǵdaiyna bailanysty aǵasy málimdeme jasaǵan edi.
Aǵasynyń aitýynsha, Alýa kúndiz-túni kóz ilmeidi, tynysh uiqydan aiyrylǵan.
"Múldem uiyqtamaidy. Kúndiz de, túnde de mazasy joq. Azdap tynyqsyn dep dári berýge týra keledi. Kóz jasyn tyimai, únemi “aiaǵym qaida?” dep suraidy. Bul suraǵy júrekti qaq aiyryp, janymyzǵa batady. Jalpy meditsinalyq jaǵdaiy – birqalypty", – dep jazady ol.
Alýanyń halin balalar ombýdsmeni Dinara Zakieva da arnaiy baryp bildi.
"Alýashpen jáne anasymen jolyqtyq. Protezdeý men ońaltý jaiyn talqyladyq. Qyzymyzben syrlasyp, kitap oqydyq. Biraz pitstsa jedi, únemi “meni kóterip júrshi” nemese “dalaǵa shyǵaiyqshy” dep surai beredi", – dedi ombýdsmen.
Dinara Zakieva bul otbasynyń jaǵdaiy Astana qalasynyń ákimi Jeńis Qasymbektiń tikelei baqylaýynda ekenin de atap ótti.
Eske sala keteiik, buǵan deiin elordada jolaýshylar avtobýsy apatqa ushyrap, birneshe adam jaraqat alǵan bolatyn. Alýa – sol apattyń eń aýyr zardap shekken jolaýshylarynyń biri.
