Astanadaǵy jantúrshigerlik jol apatynan keiin aiaǵynan aiyrylǵan 8 jastaǵy Alýanyń jaǵdaiy kópshiliktiń júregin aýyrtty. Qyzdyń aǵasy onyń qazirgi hal-ahýaly jaily áleýmettik jelide jazba jariialady, dep habarlaidy Dalanews.kz.
Aǵasynyń aitýynsha, Alýa kúndiz-túni kóz ilmeidi, tynysh uiqydan aiyrylǵan.
"Múldem uiyqtamaidy. Kúndiz de, túnde de mazasy joq. Azdap tynyqsyn dep dári berýge týra keledi. Kóz jasyn tyimai, únemi “aiaǵym qaida?” dep suraidy. Bul suraǵy júrekti qaq aiyryp, janymyzǵa batady. Jalpy meditsinalyq jaǵdaiy – birqalypty", – dep jazady ol.
Alýanyń halin balalar ombýdsmeni Dinara Zakieva da arnaiy baryp bildi.
"Alýashpen jáne anasymen jolyqtyq. Protezdeý men ońaltý jaiyn talqyladyq. Qyzymyzben syrlasyp, kitap oqydyq. Biraz pitstsa jedi, únemi “meni kóterip júrshi” nemese “dalaǵa shyǵaiyqshy” dep surai beredi", – dedi ombýdsmen.
Dinara Zakieva bul otbasynyń jaǵdaiy Astana qalasynyń ákimi Jeńis Qasymbektiń tikelei baqylaýynda ekenin de atap ótti.
Eske salaiyq, Astanada jolaýshylar avtobýsy apatqa ushyrady. Avtobýs júrgizýshisi rólge ie bola almai, jol jiegindegi baǵanaǵa soǵylǵan.
Astana qalasy ákimdiginiń baspasóz qyzmeti avtobýs apaty týraly málimdeme jasady.
"Avtobýs júrgizýshisiniń jolaýshylar kóligin júrgizý salasynda jalpy eńbek ótili 15 jyldan asady, al avtoparkte 2020 jyldan beri jumys isteidi. Oqiǵa bolǵan kúni ol aldyn ala mindetti meditsinalyq tekseristen ótip, jumysqa jiberilgen. Jumysqa demalystan keiingi alǵashqy kúni shyqqan. Avtobýs 2024 jylǵy, jelige shyqqan sátte tehnikalyq turǵydan jaramdy kúide bolǵan", - delingen habarlamada.
Atalǵan fakt boiynsha qalalyq politsiia departamenti qylmystyq is qozǵady. Oqiǵa jan-jaqty tekserilip, barlyq mán-jai anyqtalyp jatyr.
Ákimdiktiń málimetinshe, avtobýs júrgizýshileri men kólik kún saiyn jolǵa shyǵar aldynda tolyqtai tekseristen ótedi.
Sonymen qatar, avtobýstar jelige shyqpas aldynda avtobýs parkiniń jaýapty qyzmetkerleri kún saiyn mynadai jumys júrgizedi:
- Kóliktiń kózge kórinetin tustaǵy zaqymdaryn tekserý;
- Júrgizýshige qajet jiyntyqtyń (órt sóndirgish, alǵashqy meditsinalyq kómek qobdishasy, súiretkish arqan, domkrat, apattyq toqtaý belgisi) bolýyn tekserý;
- Negizgi toraptar, júieler men mehanizmderdiń jumys isteýin tekserý;
- Júrgizýshilerdiń meditsinalyq tekserisi (qan qysymyn ólsheý, dene qyzýyn ólsheý jáne t.b.).
Qazirgi tańda avtobýstyń baǵanaǵa soǵylýy saldarynan 3 jolaýshy aýrýhanada jatyr. Onyń biri – 2017 jyly týǵan qyz balaǵa ota jasalyp, eki aiaǵy ampýtatsiialandy. Taǵy eki jolaýshy qatty zardap shekken.
Qala ákimdigi zardap shekkenderge meditsinalyq jáne psihologiialyq kómek kórsetip jatyr, sondai-aq materialdyq jáne basqa da qajetti qosymsha kómek kórsetilmek. Zardap shekken jolaýshylarǵa qoldanystaǵy zańnamaǵa sáikes, meditsinalyq jáne saqtandyrý saraptamalary júrgizilgennen keiin aqshalai ótemaqy tólenedi.
